കൊച്ചി :ട്രെയിനില്‍ നിന്ന് ഭാരതപുഴയിലേക്ക് വീണ് 47കാരന് ഗുരുതര പരിക്ക്. ബുധനാഴ്ച വൈകീട്ടായിരുന്നു സംഭവം. കോട്ടയം കുമ്പിടി സ്വദേശി പാലക്കുന്നേല്‍ വീട്ടില്‍ കുരുവിള ഫിലിപ്പോസിനാണ് പരിക്കേറ്റത്. കേരള എക്സ്പ്രസ് കൊച്ചിന്‍ പാലത്തിന് സമീപത്തെ റെയില്‍വേ പാലത്തിലൂടെ പോകുന്നതിനിടയിലാണ് ഇയാള്‍ വീണത്. പുഴയിലെ വെള്ളത്തിലേക്ക് യാത്രക്കാരന്‍ വീഴുന്നത് സമീപം ക്രിക്കറ്റ് കളിക്കുന്നവര്‍ കാണുകയും ഉടന്‍ രക്ഷിക്കുകയുമായിരുന്നു. വള്ളത്തോള്‍ നഗര്‍ ഗ്രാമപഞ്ചായത്ത് അംഗം കെ.ആര്‍ ഗിരീഷിന്റെ നേതൃത്വത്തില്‍ ഇയാളെ തൃശൂര്‍ ഗവ.മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. അബോധാവസ്ഥയില്‍ കഴിയുന്ന ഫിലിപോസ് അത്യാഹിത വിഭാഗത്തില്‍ ചികിത്സയിലാണ്.
