മഡ്ഗാവ്: കേരളം ഇന്ന് ഛത്തിസ്ഗഢിനെ നേരിടും. സന്തോഷ് ട്രോഫി ഫുട്ബാൾ ഗ്രൂപ് എയിലെ മൂന്നാം ലാണ് കേരളം ഇന്ന് ഛത്തിസ്ഗഢിനെതിരെ ഫൈനൽ റൗണ്ട് ഉറപ്പാക്കാൻ മത്സരിക്കുന്നത്.
ഇന്ന് വിജയം സ്വന്തമാക്കിയാൽ ഫൈനൽ റൗണ്ട് ഏറക്കുറെ ഉറപ്പിക്കാം കേരളത്തിന്. കാരണം, ആദ്യ രണ്ടു കളികളിലും ഏകപക്ഷീ‍യ ജയം നേടിയത് കേരളമാണ്. കേരളത്തിന് ഇന്ന് ഛത്തിസ്ഗഢിനെയും തോൽപിക്കാനായാൽ അത് വലിയ നേട്ടങ്ങളിൽ ഒന്നാകും. ഗ്രൂപ്പിലെ രണ്ടു മത്സരങ്ങളും ജയിച്ച് ആറു പോയന്റോടെ ഒന്നാമതാണ് നിജോ ഗിൽബർട്ടും സംഘവും.
രണ്ടു കളികളിൽ നാലു പോയന്റുമായി ഗോവ രണ്ടാമതും മൂന്നു മത്സരങ്ങൾ കളിച്ച ഗുജറാത്ത് (4) മൂന്നാം സ്ഥാനത്തുമാണ്. ആറു ഗ്രൂപ്പിലെയും ജേതാക്കളും ഏറ്റവും മികച്ച മൂന്നു രണ്ടാം സ്ഥാനക്കാരുമാണ് ഫൈനൽ റൗണ്ടിൽ പ്രവേശിക്കുക. ഗുജറാത്തിനെ എതിരില്ലാത്ത മൂന്നു ഗോളിന് തോൽപിച്ചാണ് കേരളം തുടങ്ങിയത്. തുടർന്ന് ജമ്മു-കശ്മീരിനെ 6-1നും തകർത്തു.
