ഗ്രൗണ്ടിൽ കിടിലൻ ബാറ്റിംഗ് നടത്തുന്ന മലയാളികളുടെ പ്രിയപ്പെട്ട ക്രിക്കറ്റ് താരമാണ് സഞ്ജു വി സാംസൺ. ആരാധകർ ഏറെയുള്ള താരത്തിന്റെ പേരുമാറ്റമാണ് ഇപ്പോൾ സോഷ്യൽ മീഡിയയിൽ ഏറെ ചർച്ച. പേരിൽ നിന്നും സാംസൺ മാറ്റിയാണ് മാറ്റത്തിനു തുടക്കം കുറിച്ചിരിക്കുന്നത്. ഇനി മുതൽ സെക്കന്റ് നെയിം വിശ്വനാഥൻ എന്നാക്കി.
സയ്യിദ് മുഷ്താഖ് അലി ട്രോഫിയ്‌ക്ക് മുന്നോടിയായി ഭാഗ്യ പരീക്ഷണത്തിനായി പേരുമാറ്റി മലയാളി താരം സഞ്ജു വി സാംസൺ. ഏഷ്യാകപ്പ്, ഏഷ്യൻ ഗെയിംസ് മത്സരങ്ങളിലെ ഇന്ത്യൻ ടീമിലേക്ക് തഴയപ്പെട്ട സഞ്ജു ഈ മത്സരത്തിലൂടെ സെലക്ടർമാർക്ക് മറുപടി നൽകുമെന്നാണ് ആരാധകർ പറയുന്നത്.
ടീം ലിസ്റ്റിൽ സാധാരണ സഞ്ജു വി സാംസൺ അഥവാ സഞ്ജു സാംസൺ എന്നാണ് കാണാറുളളത്. എന്നാൽ ഇപ്പോൾ നായകനെന്ന നിലയിൽ സഞ്ജു വിശ്വനാഥൻ എന്നാണ് ടീം പ്രഖ്യാപിച്ചിരുന്നത്. സഞ്ജുവിന്റെ പിതാവിന്റെ പേര് സാംസൺ വിശ്വനാഥനെന്നാണ്. ഈ പേരിൽ സാംസണെ ഉൾപ്പെടുത്തിയാണ് സഞ്ജു സാംസൺ എന്ന പേര് സഞ്ജു ഉപയോഗിച്ചിരുന്നത്. എന്നാൽ ഇപ്പോൾ ഇതിന് മാറ്റം വന്നു. വിശ്വനാഥനെന്നാണ് പേരിനൊപ്പം കൂട്ടിച്ചേർത്തിരിക്കുന്നത്.
എന്നാൽ സഞ്ജുവിന്റെ പേര് കേരള ടീം പ്രഖ്യാപിച്ചപ്പോൾ നൽകിയത് സഞ്ജു വിശ്വനാഥനെന്നാണെങ്കിലും താരത്തിന്റെ പേര് ഔദ്യോഗികമായി മാറ്റാത്തതിനാൽ സഞ്ജു സാംസണെന്ന് തന്നെ തുടരാനാണ് സാധ്യത.
