മലപ്പുറം: മദ്യപിച്ച് ഔദ്യോഗിക വാഹനം ഓടിച്ച് അപകടമുണ്ടാക്കിയ പൊലീസ് ഉദ്യോഗസ്ഥനെ നാട്ടുകാർ തടഞ്ഞുവച്ച് പൊലീസിലേൽപ്പിച്ചു. മലപ്പുറം വടക്കാങ്ങര കാളാവിലാണ് മലപ്പുറം സ്റ്റേഷനിലെ എഎസ്ഐ ഗോപി മോഹനെ നാട്ടുകാർ തടഞ്ഞുവച്ചത്. നാട്ടുകാർ അറിയിച്ചതനുസരിച്ച് മങ്കട പൊലീസെത്തി ഉദ്യോഗസ്ഥനെ കസ്റ്റഡിയിലെടുക്കുകയായിരുന്നു. മദ്യപിച്ച് വാഹനമോടിച്ചതിന് ഗോപി മോഹനെതിരെ കേസെടുത്തിട്ടുണ്ട്.
ഇന്നലെ രാത്രി 10 മണിയോടെയാണ് ഗോപി മോഹൻ ഓടിച്ച വാഹനം അപകടമുണ്ടാക്കുന്നത്. പൊലീസ് വാഹനം ഒരു കാർ ഇടിച്ചിട്ട് പോകുന്നത് നാട്ടുകാരുടെ ശ്രദ്ധയിൽപ്പെടുകയും ജീപ്പ് തടഞ്ഞുവച്ച നാട്ടുകാർ ഉദ്യോഗസ്ഥനെ പോകാൻ അനുവദിക്കാതിരിക്കുകയുമായിരുന്നു. കാർ ഇടിച്ച ശേഷം വേഗത്തിൽ ഓടിച്ച ജീപ്പ് മറ്റൊരു ബൈക്കിനേയും ഇടിക്കാൻ ശ്രമിച്ചിരുന്നു. ഈ ബൈക്ക് യാത്രികനും മറ്റ് നാട്ടുകാരും ചേർന്നാണ് ജീപ്പ് വളഞ്ഞ് ഉദ്യോഗസ്ഥനെ പുറത്തിറക്കിയത്.
നാട്ടുകാർ തടഞ്ഞ് നിർത്തിയപ്പോൾ താൻ വണ്ടിയെടുത്ത് പോകുമെന്നായിരുന്നു എഎസ്‌ഐയുടെ നിലപാട്. എന്നാൽ വാഹനത്തിന്റെ ചാവിയൂരിയെടുത്ത നാട്ടുകാർ ഇയാളെ പോകാൻ അനുവദിച്ചില്ല. വണ്ടി തടഞ്ഞ് ഉദ്യോഗസ്ഥനോട് സംസാരിച്ചപ്പോഴാണ് ഇദ്ദേഹം മദ്യപിച്ചിട്ടുള്ളതായി നാട്ടുകാർക്ക് ബോധ്യപ്പെടുന്നത്. ഉടൻ തന്നെ ഇവർ പൊലീസിൽ വിവരമറിയിച്ചു. ജില്ലാ പൊലീസ് മേധാവിയെ നാട്ടുകാർ വിളിച്ച് വിവരം പറഞ്ഞു. തുടർന്ന് ജില്ലാ പൊലീസ് മേധാവിയുടെ നിർദേശത്തെ തുടർന്നാണ് മങ്കട പൊലീസെത്തി മദ്യപിച്ച് വാഹനമോടിച്ച ഉദ്യോഗസ്ഥനെ കസ്റ്റഡിയിലെടുക്കുന്നത്.
