പത്തനംതിട്ട : പത്തനംതിട്ട–കോയമ്പത്തൂർ കെഎസ്‍ആർടിസി ബസ് സർവീസ് വീണ്ടും മുടങ്ങി. രാവിലെ ഒൻപതരയ്ക്ക് പോകേണ്ട സർവീസാണ് സാങ്കേതിക തകരാർ മൂലം മുടങ്ങിയത്. പകരം ഓടിക്കാൻ സൂപ്പർ ഫാസ്റ്റ് പോലുമില്ലാത്തതിനാൽ യാത്രക്കാർക്ക് പണം മടക്കി നൽകി. കോയമ്പത്തൂർ പെർമിറ്റുള്ള ഒരു ബസ് ഉപയോഗിച്ച് 3 സർവീസ് നടത്തുന്ന സംസ്ഥാനത്തെ ഏക ഡിപ്പോയാണ് പത്തനംതിട്ട.
മുഴുവൻ സീറ്റിലും ബുക്കിങ് ഉണ്ടായിരുന്ന സർവീസാണ് മുടങ്ങിയത്. പുതിയ ബസുകളും പെർമിറ്റുകളും അനുവദിക്കാതെ കാലപ്പഴക്കം ചെന്ന ബസുകളുപയോഗിച്ചുള്ള സർക്കസാണ് പത്തനംതിട്ടയിൽ. ബ്രേക്ക് ഡൗണാകുന്ന ബസുകളുടെ എണ്ണം കഴിഞ്ഞ ഒരു മാസമായി കൂടുതലാണ്.
