തിരുവനന്തപുരം: ‘കുത്തിത്തിരിപ്പി’ന്റെ കാര്യത്തില്‍ ‘കേരളത്തിന്റെ മുത്തയ്യ മുരളീധരന്‍’ എന്ന് മന്ത്രി മുഹമ്മദ് റിയാസിനെ പരിഹസിച്ച് യൂത്ത് കോണ്‍ഗ്രസ് അധ്യക്ഷന്‍ രാഹുല്‍ മാങ്കൂട്ടത്തില്‍. കേരളത്തിലെ ജനങ്ങള്‍ക്കൊപ്പം നിന്ന് എല്‍ഡിഎഫ് സര്‍ക്കാരിന്റെ നിലപാട് പറഞ്ഞതിനാണോ ടി എന്‍ പ്രതാപന് കോണ്‍ഗ്രസ് സീറ്റ് നിഷേധിച്ചതെന്നു റിയാസ് ചോദിച്ചിരുന്നു. പിന്നാലെ ടി എന്‍ പ്രതാപനെ കേരളത്തിന്റെ കോണ്‍ഗ്രസ് വര്‍ക്കിംഗ് പ്രസിഡന്റ് ചുമതലയേല്‍പ്പിച്ചതില്‍ ആശംസ നേര്‍ന്നുകൊണ്ട് ഫേസ്ബുക്കില്‍ പങ്കുവെച്ച കുറിപ്പിലാണ് രാഹുല്‍ മാങ്കൂട്ടത്തിലിന്റെ വിമര്‍ശനം.
‘ഇത്രയും കുത്തിത്തിരുപ്പ് പറ്റുമെങ്കില്‍ താങ്കള്‍ക്ക് മുത്തയ്യ മുരളീധരന്റെ പിന്‍ഗാമിയായി ക്രിക്കറ്റില്‍ ഒരു കൈ നോക്കിക്കൂടെ, മിനിമം കേരള മുത്തയ്യയാകാം.
അത് പോട്ടെ കേരളത്തിനു വേണ്ടി ശബ്ദിച്ചു എന്ന് കുത്തിത്തിരുപ്പ് സ്‌പെഷ്യലിസ്റ്റ് ‘കേരള മുത്തയ്യ ‘ പറഞ്ഞ ടി എന്‍ പ്രതാപനെ കേരളത്തിലെ കോണ്‍ഗ്രസ്സ് വര്‍ക്കിംഗ് പ്രസിഡന്റ് എന്ന വലിയ ഉത്തരവാദിത്തം ഏല്പ്പിച്ചു.
ഇനി റിയാസ് പോയി കേരളത്തിനു വേണ്ടി ഒന്നും ചെയ്യാത്ത ‘ഇന്‍ ലോ വിജയന്‍ സാറിനോട്’ ആ CAA- NRC പ്രക്ഷോഭത്തിന്റെ പേരില്‍ എടുത്ത കേസുകള്‍ പിന്‍വലിക്കാന്‍ പറയൂ കേരള മുത്തയ്യെ…’ എന്നായിരുന്നു രാഹുലിന്റെ പരിഹാസം.
