Kerala
അപകടത്തിൽപെട്ട സ്വിഫ്റ്റ് ബസില്‍ നിന്ന് യാത്രക്കാരുടെ സാധനങ്ങള്‍ കവര്‍ന്നുവെന്ന പ്രചാരണം തെറ്റെന്ന് ബസ് ജീവനക്കാര്‍.
മൈസൂരു : മൈസൂരുവിന് സമീപം ഡിവൈഡറില്‍ തട്ടി തലകീഴായി മറിഞ്ഞ കേരള ആര്‍.ടി.സിയുടെ സ്വിഫ്റ്റ് ബസില്‍ നിന്ന് യാത്രക്കാരുടെ സാധനങ്ങള്‍ കവര്‍ന്നുവെന്ന പ്രചാരണം തെറ്റെന്ന് ബസ് ജീവനക്കാര്‍.ഇന്നലെ പുലര്‍ച്ച നാലുമണിയോടെ നടന്ന അപകടത്തില്‍ ഏഴുപേര്‍ക്ക് പരിക്കേറ്റിരുന്നു.രക്ഷാപ്രവര്‍ത്തനത്തിന് എത്തിയവര്‍ സാധനങ്ങള്‍ മോഷ്ടിച്ചുവെന്നാണ് പ്രചാരണം നടന്നത്. എന്നാല്‍, ബസിലുണ്ടായിരുന്ന 37 യാത്രക്കാരില്‍ ആര്‍ക്കും ഒന്നും നഷ്ടമായിട്ടില്ലെന്ന് ജീവനക്കാര്‍ പറഞ്ഞു.
കോട്ടയത്തുനിന്ന് തൃശൂര്‍-നിലമ്ബൂര്‍ വഴി ബംഗളൂരുവിലേക്ക് പോവുകയായിരുന്ന ബസ് മൈസൂരുവിന് 30 കിലോമീറ്റര്‍ അകലെ നഞ്ചന്‍കോടിന് സമീപമാണ് മറിഞ്ഞത്. ബസ്ജീവനക്കാരായ കെ.കെ. ജുബിന്‍, അനസ്, യാത്രക്കാരായ നിലമ്ബൂര്‍ സ്വദേശികളായ മുഹമ്മദ് യാസീന്‍ (26), ആന്‍മരിയ (25), താഹിര്‍, മലപ്പുറം സ്വദേശി ബിനിജോണ്‍, രാജേഷ് എന്നിവര്‍ക്കാണ് പരിക്ക്. പരിക്കേറ്റവരെ നഞ്ചന്‍കോടിലെ ആശുപത്രികളിലേക്ക് മാറ്റി. രാജേഷ്, ബിനി ജോണ്‍ എന്നിവരെ പിന്നീട് മൈസൂരുവിലെ അപ്പോളോ ആശുപത്രിയില്‍ പ്രവേശിപ്പിച്ചു. ബംഗളൂരുവില്‍ പഠിക്കുന്ന വിദ്യാര്‍ഥികളടക്കം 37 യാത്രക്കാരാണ് ബസില്‍ ഉണ്ടായിരുന്നത്.