ന്യൂഡൽഹി: സോഷ്യൽ മീഡിയയിൽ വൈറലായി, ഭർത്താവിനെ കഴുത്തുവരെ മണ്ണിൽ കുഴിച്ചിട്ടുള്ള ഭാര്യയുടെ പൂജ. ഭർത്താവിന്റെ ശരീരം കഴുത്തുവരെ മണ്ണിനടിയിൽ കുഴിച്ചിട്ട് തലയിൽ പാൽ അഭിഷേകവും പൂജയും നടത്തുന്ന വീഡിയോയാണ് പുറത്തുവന്നത്. സമൂഹമാധ്യമത്തിൽ വ്യാപകമായി പ്രചരിച്ച വീഡിയോ എവിടെനിന്നുള്ളതാണെന്ന് വ്യക്തമല്ല.
ഭർത്താവിന്റെ തലയിൽ പൂവും പാലും ഒഴിച്ച് സ്ത്രീ മന്ത്രം ജപിക്കുന്നത് വീഡിയോയിലുണ്ട്. ‘ഹർ ഹർ മഹാദേവ്’ എന്ന് പറഞ്ഞുകൊണ്ടാണ് സ്ത്രീ തന്റെ ഭർത്താവിനെ പൂജിക്കുന്നത്. ഭർത്താവിന്റെ തലയെ ശിവലിംഗമായി കണക്കാക്കിയാണ് പൂജയെന്ന് വീഡിയോയിൽ വ്യക്തമാണ്. മണ്ണിന് മുകളിൽ ഭർത്താവിന്റെ തലമാത്രമാണ് പുറത്തേക്ക് കാണാനാകുന്നത്. അതേസമയം സ്ത്രീ തലയിൽ പാലും പൂവും ഒഴിച്ച് പൂജ നടത്തുമ്പോഴും ഇയാൾ യാതൊരു പ്രതികരണവുമില്ലാതെ ശാന്തനായി ഇരിക്കുന്നത് വീഡിയോയിലുണ്ട്. വീഡിയോ വൈറലായതോടെ നിരവധി പേരാണ് പ്രതികരണവുമായി രംഗത്ത് വന്നത്. ചിലർ വിമർശനങ്ങൾ ഉന്നയിച്ചപ്പോൾ മറ്റുചിലർ അനുകൂലിച്ചാണ് പ്രതികരിച്ചത്.
