കേരളത്തില് ക്രമസമാധാനം പൂര്ണമായും തകര്ന്ന അവസ്ഥയിലാണെന്ന് പ്രതിപക്ഷ നേതാവ് വി.ഡി.സതീശന്. ആര്ക്കും നിയമം കയ്യിലെടുക്കാവുന്ന സ്ഥിതിലേക്കാണ് സര്ക്കാരും ആഭ്യന്തര വകുപ്പും കേരളത്തെ എത്തിച്ചിരിക്കുന്നത്. നിഷ്ഠൂരമായ കൊലപാതകങ്ങളും ആക്രമണങ്ങളുമാണ് എല്ലാ ദിവസങ്ങളിലും റിപ്പോര്ട്ട് ചെയ്യപ്പെടുന്നതെന്നും സതീശന് പറഞ്ഞു.
![](https://www.kottayammedia.com/wp-content/uploads/2023/10/achayans-gold-oct-23.jpg)
“കഴിഞ്ഞ ദിവസം തിരുവനന്തപുരത്ത് കാറിലെത്തിയ ഗുണ്ടാ സംഘം യുവാവിനെ തലയ്ക്കടിച്ചു കൊലപ്പെടുത്തി. തലയോട്ടി പിളര്ന്ന നിലയിലാണ് യുവാവിനെ ആശുപത്രിയില് എത്തിച്ചത്. മൂവാറ്റുപുഴയില് മകന് അമ്മയെ കഴുത്തില് ഷാള് മുറുക്കി ശ്വാസം മുട്ടിച്ചു കൊലപ്പെടുത്തി. പെരിന്തല്മണ്ണയില് ഇതരസംസ്ഥാന തൊഴിലാളിയെ ദമ്പതികള് കൊലപ്പെടുത്തി. തൃശൂര് ചേര്പ്പില് അച്ഛനും മകനുമായുള്ള വഴക്കില് ഇടപെട്ട യുവാവിനെ ഗുണ്ടകള് അടിച്ചുകൊന്നു. എറണാകുളം തമ്മനത്ത് നടുറോഡില് ബൈക്ക് വച്ചതിനെ ചൊല്ലി ഉണ്ടായ തര്ക്കത്തില് യുവാവിനെ കുത്തിക്കൊന്നു. ഇങ്ങിനെ നിരവധി കൊലപാതകങ്ങളും അക്രമ സംഭവങ്ങളുമാണ് ഓരോ ദിവസവും നടക്കുന്നത്.”
![](https://www.kottayammedia.com/wp-content/uploads/2024/07/jaico-4-7-24.jpg)
“നിയന്ത്രിക്കാന് ആരുമില്ലാതെ കുത്തഴിഞ്ഞ അവസ്ഥയിലാണ് പോലീസ് സംവിധാനം. ആഭ്യന്തരവകുപ്പിന്റെ ചുമതലയുള്ള മുഖ്യമന്ത്രി ടൂറിലാണ്. അദ്ദേഹം ഉണ്ടായിരുന്നപ്പോഴും ഇതൊക്കെ തന്നെയായിരുന്നു അവസ്ഥ. പൊലീസിനെ രാഷ്ട്രീയവത്ക്കരിച്ച് പ്രദേശിക സ്റ്റേഷനുകളുടെ നിയന്ത്രണം സിപിഎം ജില്ല, ഏരിയ കമ്മിറ്റികള്ക്ക് വിട്ടുകൊടുത്തതാണ് ക്രമസമാധാന തകര്ച്ചയ്ക്ക് കാരണം. ലഹരി- ഗുണ്ടാ മാഫിയകളുടെ കണ്ണികളായ പ്രവര്ത്തിക്കുന്നതും അത്തരം സംഘങ്ങള്ക്ക് രാഷ്ട്രീയ രക്ഷാകര്തൃത്വം നല്കുന്നതും സി.പി.എം നേതാക്കളാണ്. ആലപ്പുഴയില് ഉള്പ്പെടെ ഇത് എത്രയോ തവണ വ്യക്തമായതാണ്.”‘
“ഗുരുതര ക്രമസമാധാന പ്രശ്നങ്ങള് ആവര്ത്തിക്കുമ്പോഴും സേനയ്ക്ക് ഒരു തലവനുണ്ടോയെന്നു പോലും സംശയിക്കേണ്ട നിലയിലേക്കാണ് കാര്യങ്ങള് പോകുന്നത്. ക്രമസമാധാനം വീണ്ടെടുക്കാനും ക്രിമിനലുകളെയും ലഹരി സംഘങ്ങളെയും നിയന്ത്രിക്കാനും പോലീസ് അടിയന്തരമായി തയാറാകണം. ടൂറിനു പോയ ആഭ്യന്തര മന്ത്രിയുടെ തിരിച്ചുവരവിന് കാത്തിരിക്കാതെ ക്രിമിനലുകള്ക്കെതിരെ കര്ശന നടപടി സ്വീകരിക്കാനും ക്രമസമാധാനം നടപ്പാക്കാനുമുള്ള നിര്ദ്ദേശം നല്കാന് സംസ്ഥാന പോലീസ് മേധാവി തയാറാകണം.” – സതീശന് ആവശ്യപ്പെട്ടു.
![](https://kottayammedia.com/wp-content/uploads/2021/11/logo111.png)
![](https://kottayammedia.com/wp-content/uploads/2021/12/ad1.png)