ഉത്തരാഖണ്ഡിലെ ലോകപ്രശസ്തമായ ബദരീനാഥ്, കേദാർനാഥ് ക്ഷേത്രങ്ങളിൽ അഹിന്ദുക്കൾക്ക് പ്രവേശനം വിലക്കാൻ തീരുമാനം. ചാർധാം തീർത്ഥാടനത്തിന്റെ ഭാഗമായ ഈ ക്ഷേത്രങ്ങൾ നിയന്ത്രിക്കുന്ന ബദരീനാഥ്-കേദാർനാഥ് ടെമ്പിൾ കമ്മിറ്റി (BKTC) ആണ് ഇക്കാര്യം അറിയിച്ചത്. ഹിമാലയ സാനുക്കളിലെ ഈ രണ്ട് പ്രധാന ക്ഷേത്രങ്ങൾ കൂടാതെ, കമ്മിറ്റിയുടെ കീഴിലുള്ള മറ്റ് 45 ക്ഷേത്രങ്ങളിലും ഈ പുതിയ നിയമം ബാധകമായിരിക്കും.
അഹിന്ദുക്കളുടെ പ്രവേശനം നിരോധിച്ചുകൊണ്ടുള്ള പ്രമേയം വരാനിരിക്കുന്ന കമ്മിറ്റി യോഗത്തിൽ പാസാക്കും. ഉത്തരാഖണ്ഡിന്റെ മതപരവും സാംസ്കാരികവുമായ പാരമ്പര്യം സംരക്ഷിക്കാനാണ് ഈ നീക്കമെന്ന് കമ്മിറ്റി പ്രസിഡന്റ് ഹേമന്ത് ദ്വിവേദി പറഞ്ഞു. നേരത്തെയും ഇത്തരം നിയന്ത്രണങ്ങൾ ഉണ്ടായിരുന്നെങ്കിലും മുൻപ് വന്ന സർക്കാരുകൾ അത് അവഗണിക്കുകയായിരുന്നുവെന്നും അദ്ദേഹം അവകാശപ്പെട്ടു.
