തിരുവനന്തപുരം: കഴക്കൂട്ടത്ത് ഹോസ്റ്റലിൽ അതിക്രമിച്ചു കയറി ടെക്നോപാർക്ക് ജീവനക്കാരിയെ ലൈംഗിക പീഡനത്തിനിരയാക്കിയ സംഭവത്തിൽ കൂടുതൽ വിവരങ്ങൾ പുറത്ത്.
തമിഴ്നാട് സ്വദേശിയായ പ്രതി ഹോസ്റ്റലിൽ എത്തിയത് മോഷണം ലക്ഷ്യമിട്ടെന്നാണ് പൊലീസ് വ്യക്തമാക്കുന്നത്. മോഷണ ശ്രമത്തിനിടെയാണ് ഇയാൾ യുവതിയെ പീഡനത്തിനിരയാക്കിയത്. ക്രിമിനൽ പശ്ചാത്തലമുള്ളയാളാണ് പ്രതിയെന്നും പൊലീസ് വ്യക്തമാക്കുന്നു.
ഇന്നലെയാണ് തമിഴ്നാട്ടിലെ മധുര സ്വദേശിയായ പ്രതിയെ പൊലീസ് അറസ്റ്റ് ചെയ്തത്. ഇയാൾ ലോറി ഡ്രൈവറാണ്. ജോലിയുടെ ഭാഗമായാണ് ഇയാൾ തിരുവനന്തപുരത്ത് എത്തിയത്. മോഷണത്തിനായി ഹോസ്റ്റലിൽ കയറിയ ഇയാൾ ഉറങ്ങിക്കിടന്ന യുവതിയെ പീഡിപ്പിക്കുകയായിരുന്നു.
പ്രതിയെ സ്ഥലത്തെത്തിച്ച് പൊലീസ് ഇന്നു തെളിവെടുപ്പ് നടത്തുമെന്നാണു വിവരം. അതിക്രമത്തിനിരയായ യുവതിക്ക് തിരിച്ചറിയൽ പരേഡ് നടത്തിയ ശേഷമാകും പ്രതിയുടെ കൂടുതൽ വിവരങ്ങൾ വെളിപ്പെടുത്തുക. സിസിടിവി ദൃശ്യങ്ങൾ കേന്ദ്രീകരിച്ചുള്ള അന്വേഷണത്തിലാണ് പ്രതിയെ ഉടൻ പിടികൂടാനായത്.
