പാലക്കാട് : പാലക്കാട് എംഎല്എ സ്ത്രീ സുരക്ഷയ്ക്ക് അപകടം സൃഷ്ടിക്കുകയാണെന്ന പ്രധാനമന്ത്രി നരേന്ദ്ര മോദിയുടെ വാക്കുകള്ക്ക് മറുപടിയുമായി രാഹുല് മാങ്കൂട്ടത്തില് എംഎല്എ. ഫെയ്സ്ബുക്ക് കുറിപ്പിലൂടെയാണ് രാഹുലിന്റെ വിമര്ശനം.
രാജ്യത്തിന്റെ അഭിമാനമുയര്ത്തിയ കായിക താരങ്ങളായ വിനേഷ് ഫോഗട്ടും സാക്ഷി മാലിക്കും ബജ്രങ് പുനിയയും തങ്ങള് നേരിട്ട അതിക്രമങ്ങളെക്കുറിച്ച് പരാതിപ്പെട്ടപ്പോള് രാജ്യം തലകുനിച്ചു നിന്ന നിമിഷങ്ങള് പ്രധാനമന്ത്രി മറന്നോ എന്നും രാഹുല് മാങ്കൂട്ടത്തില് ചോദിച്ചു.
‘സ്ത്രീസുരക്ഷ എന്ന വാക്ക് ഉച്ചരിക്കാന് എങ്കിലും നിങ്ങള്ക്ക് അവകാശം ഉണ്ടോ? ഇന്ത്യ എന്ന നമ്മുടെ രാജ്യത്തിന്റെ യശസ്സ് വാനോളം ഉയര്ത്തിയ വിനേഷ് ഭോഗട്ടും സാക്ഷി മാലിക്കും ബജ്രാംഗ് പുനിയയും അവര്ക്ക് നേരിടേണ്ടി വന്ന അതിക്രമത്തെ പറ്റി ഉന്നയിച്ചപ്പോള് ഈ രാജ്യം തലകുനിച്ചുനിന്ന നാളുകള് അങ്ങ് മറന്നാലും ഇന്ത്യ മറക്കില്ല. അന്നവര് ആരോപണം ഉന്നയിച്ച അങ്ങയുടെ സുഹൃത്ത് ബ്രിജ് ഭൂഷനെ ചേര്ത്ത് പിടിച്ച് സംരക്ഷിച്ച ആളല്ലേ നിങ്ങള്? ആ നിങ്ങളാണോ ധാര്മികതയെ പറ്റി പ്രസംഗിക്കുന്നത്?,’ എന്ന് രാഹുല് ചോദിക്കുന്നു.
