ചങ്ങനാശേരി: ചങ്ങനാശേരി അതിരൂപതയുടെ കീഴിലുള്ള പ്രമുഖ മരിയൻ തീർഥാടനകേന്ദ്രമായ പാറേൽ സെന്റ് മേരീസ് പള്ളിയെ വത്തിക്കാൻ ബസിലിക്ക പദവിയിലേക്ക് ഉയർത്തി. പുതിയ ദേവാലയത്തിന്റെ കൂദാശയ്ക്ക് ദിവസങ്ങൾ മാത്രം ശേഷിക്കെ പുറത്തുവന്ന പ്രഖ്യാപനം വിശ്വാസികൾക്ക് ഇരട്ടി സന്തോഷമായി.
ചങ്ങനാശേരി പാറേൽ മർത്തമറിയം അമലോത്ഭവ മാതാ ദേവാലയത്തിന് ലഭിച്ച ബസിലിക്ക പദവി അതിരൂപതയ്ക്കും വിശ്വാസസമൂഹത്തിനും ചരിത്രപ്രാധാന്യമുള്ള നേട്ടമാണ്. മധ്യകേരളത്തിലെ പ്രമുഖ മരിയൻ തീർഥാടനകേന്ദ്രങ്ങളിലൊന്നായ പാറേൽ പള്ളി പരിശുദ്ധ കന്യകാമറിയത്തിന്റെ അമലോത്ഭവ തിരുനാളിന്റെ പേരിലും പ്രസിദ്ധമാണ്.
ഇനി മുതൽ “മർത്ത് മറിയം ഇമ്മാക്കുലേറ്റ് കൺസെപ്ഷൻ ഷ്രൈൻ ബസിലിക്ക” (Marth Mariam Immaculate Conception Shrine Basilica) എന്ന പേരിലാകും ദേവാലയം അറിയപ്പെടുക. ലെയോ പതിനാലാമൻ മാർപാപ്പയുടെ അംഗീകാരത്തോടെ ദൈവാരാധനയ്ക്കും കൂദാശകളുടെ അച്ചടക്കത്തിനുമായുള്ള വത്തിക്കാൻ ഡിക്കാസ്റ്ററിയാണ് ബസിലിക്ക പദവി അനുവദിച്ചത്.
നവംബർ 21ന് പുതിയ ദേവാലയത്തിന്റെ കൂദാശ
തീർഥാടകരുടെ എണ്ണം വർധിച്ചതിനെത്തുടർന്നാണ് പഴയ ദേവാലയത്തിന് പകരം വിശാലമായ പുതിയ പള്ളി നിർമിക്കാൻ തീരുമാനിച്ചത്. 51,000 ചതുരശ്രയടിയിലധികം വിസ്തീർണമുള്ള പുതിയ ദേവാലയം മൂന്ന് നിലകളിലായാണ് നിർമിച്ചിരിക്കുന്നത്. പ്രധാന പള്ളിയിൽ ഒരേസമയം ഏകദേശം 3,000 പേർക്ക് ആരാധനാകർമങ്ങളിൽ പങ്കെടുക്കാൻ സൗകര്യമുണ്ട്.
പുതിയ ദേവാലയത്തിന്റെ കൂദാശ നവംബർ 21ന് നടക്കും. ആർച്ച് ബിഷപ്പ് എമിരിറ്റസ് മാർ ജോസഫ് പെരുന്തോട്ടം മുഖ്യകാർമികത്വം വഹിക്കും. പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് വചനസന്ദേശം നൽകും.
എന്താണ് ബസിലിക്ക പദവി?
കത്തോലിക്കാ സഭയിൽ ചരിത്രപരവും ആത്മീയവും ആരാധനാക്രമപരവുമായ പ്രാധാന്യമുള്ള ദേവാലയങ്ങൾക്കാണ് പ്രത്യേക പരിഗണനയുടെ അടിസ്ഥാനത്തിൽ ബസിലിക്ക പദവി നൽകുന്നത്. ദേവാലയത്തിന്റെ ചരിത്രം, ആത്മീയപ്രാധാന്യം, കലാപരമായ സവിശേഷതകൾ, സൗകര്യങ്ങൾ എന്നിവയും ഇതിന് പരിഗണിക്കപ്പെടുന്നു.
ബസിലിക്ക പദവി ലഭിക്കുന്നതോടെ ദേവാലയത്തിന് ആഗോള കത്തോലിക്കാ സഭയുമായും മാർപാപ്പയുമായുമുള്ള പ്രത്യേക ആത്മീയബന്ധം കൂടുതൽ ശക്തമാകും. പ്രത്യേക ആരാധനാക്രമപരമായ അവകാശങ്ങളും ചില ചിഹ്നങ്ങൾ ഉപയോഗിക്കാനുള്ള അനുമതിയും ലഭിക്കും.
ചങ്ങനാശേരി അതിരൂപതയിലെ ചമ്പക്കുളം കല്ലൂർക്കാട് സെന്റ് മേരീസ് പള്ളിക്കും നേരത്തേ ബസിലിക്ക പദവി ലഭിച്ചിട്ടുണ്ട്.പുതിയ ദേവാലയത്തിന്റെ കൂദാശയ്ക്കുള്ള ഒരുക്കങ്ങൾ പുരോഗമിക്കുന്നതിനിടെ ബസിലിക്ക പദവി കൂടി ലഭിച്ചത് പാറേൽ തീർഥാടനകേന്ദ്രത്തിന്റെ പ്രാധാന്യം വർധിപ്പിക്കുന്നതായി.
