തിരുവനന്തപുരം: വിദേശ ഫണ്ടുകൾ നിയന്ത്രിക്കുന്ന എഫ്സിആർഎ നിയമത്തെ ചുറ്റിപ്പറ്റി ഉയരുന്ന വിവാദങ്ങൾ അടിസ്ഥാനരഹിതമാണെന്നും, രാജ്യസുരക്ഷയും സാമ്പത്തിക സുതാര്യതയും ഉറപ്പാക്കാൻ ഈ നിയമം നിർണായകമാണെന്നും ബിജെപി സംസ്ഥാന വക്താവ് അഡ്വ. എസ്. ജയസൂര്യൻ പറഞ്ഞു. തിരുവനന്തപുരത്ത് നടന്ന വാർത്താസമ്മേളനത്തിലാണ് അദ്ദേഹം പ്രതികരിച്ചത്.
1976-ൽ മുൻ പ്രധാനമന്ത്രി ഇന്ദിരാ ഗാന്ധിയുടെ ഭരണകാലത്ത് കൊണ്ടുവന്ന എഫ്സിആർഎ നിയമം വിദേശത്തുനിന്നുള്ള ധനസഹായം നിയന്ത്രിക്കാൻ ലക്ഷ്യമിട്ടതാണെന്നും, പിന്നീട് നിരവധി ഭേദഗതികൾ വഴിയാണ് നിയമം ശക്തിപ്പെടുത്തിയതെന്നും അദ്ദേഹം വ്യക്തമാക്കി. നിലവിൽ കൂടുതൽ കർശനമായ നിയമപരിഷ്കരണങ്ങൾ പാർലമെന്റിൽ പരിഗണനയിലുണ്ടെന്നും അദ്ദേഹം പറഞ്ഞു.
എഫ്സിആർഎ നിയമം ഒരു പ്രത്യേക മതവിഭാഗത്തെ ലക്ഷ്യമിടുന്നതാണെന്ന ആരോപണങ്ങൾ തെറ്റാണെന്ന് ജയസൂര്യൻ വ്യക്തമാക്കി. ഈ നിയമം എല്ലാ മത-സാമൂഹിക സംഘടനകൾക്കും ഒരുപോലെ ബാധകമാണെന്നും, ഹിന്ദു, മുസ്ലിം, സിഖ്, ബൗദ്ധ, ജൈന, പാഴ്സി എന്നീ വിഭാഗങ്ങളുമായി ബന്ധപ്പെട്ട സംഘടനകളും വിദേശ ഫണ്ടുകൾ സ്വീകരിക്കുന്നുണ്ടെന്നും അദ്ദേഹം ചൂണ്ടിക്കാട്ടി.
കേരളത്തിലെ തെരഞ്ഞെടുപ്പ് സാഹചര്യത്തിൽ ചിലർ ഈ വിഷയത്തെ രാഷ്ട്രീയവൽക്കരിക്കുകയാണെന്നും, പ്രത്യേകിച്ച് കോൺഗ്രസും കമ്മ്യൂണിസ്റ്റ് പാർട്ടികളും തെറ്റായ ധാരണകൾ സൃഷ്ടിക്കാൻ ശ്രമിക്കുന്നുവെന്നും അദ്ദേഹം ആരോപിച്ചു. ചില മതനേതാക്കളുടെ പ്രതികരണങ്ങളും ഇതിന് വഴിവെച്ചതായും അദ്ദേഹം കൂട്ടിച്ചേർത്തു.
രാജ്യത്തുടനീളം പ്രവർത്തിക്കുന്ന വിവിധ സംഘടനകൾക്ക് വിദേശ ഫണ്ടുകൾ ലഭിക്കുന്നുണ്ടെന്നും, ആർട്ട് ഓഫ് ലിവിങ്, ബ്രഹ്മകുമാരീസ്, മാതാ അമൃതാനന്ദമയി മഠം തുടങ്ങിയ സംഘടനകളുടെ പ്രവർത്തനം ഇതിന് ഉദാഹരണമാണെന്നും അദ്ദേഹം പറഞ്ഞു.
എഫ്സിആർഎ നിയമലംഘനവുമായി ബന്ധപ്പെട്ട് ചില സ്ഥാപനങ്ങൾക്കെതിരെ അന്വേഷണം തുടരുകയാണെന്നും, രാജീവ് ഗാന്ധി ഫൗണ്ടേഷൻ, രാജീവ് ഗാന്ധി ചാരിറ്റബിൾ ട്രസ്റ്റ് എന്നിവയ്ക്കെതിരെ കേസുകൾ നിലനിൽക്കുന്നുണ്ടെന്നും അദ്ദേഹം ആരോപിച്ചു. വിദേശ ഫണ്ടുകൾ രാഷ്ട്രീയ ആവശ്യങ്ങൾക്ക് ഉപയോഗിച്ചെന്നതാണ് പ്രധാന ആരോപണമെന്നുമാണ് അദ്ദേഹത്തിന്റെ വാദം.
രാജ്യസുരക്ഷയെ ബാധിക്കുന്ന രീതിയിൽ വിദേശ ഫണ്ടുകൾ ദുരുപയോഗം ചെയ്ത സംഭവങ്ങൾ കണ്ടെത്തിയിട്ടുണ്ടെന്നും, നിയമം കർശനമാക്കിയതോടെ ഇത്തരം പ്രവർത്തനങ്ങൾ കുറയാൻ സഹായിച്ചുവെന്നും അദ്ദേഹം അവകാശപ്പെട്ടു. കഴിഞ്ഞ ആറു വർഷത്തിനിടെ ഏകദേശം 22,000 എഫ്സിആർഎ അക്കൗണ്ടുകൾക്കെതിരെ നടപടി സ്വീകരിച്ചതായും, വിശദീകരണം നൽകാനാകാത്ത അക്കൗണ്ടുകൾ റദ്ദാക്കിയതായും അദ്ദേഹം വ്യക്തമാക്കി.
എഫ്സിആർഎ നിയമത്തെക്കുറിച്ചുള്ള യഥാർത്ഥ വിവരങ്ങൾ പൊതുജനങ്ങൾ ഔദ്യോഗിക മാർഗങ്ങളിലൂടെ മനസ്സിലാക്കണമെന്നും, തെറ്റായ പ്രചാരണങ്ങളിൽ വീഴരുതെന്നും പാലാ മീഡിയാ അക്കാദമിയിൽ നടന്ന വാർത്താ സമ്മേളനത്തിൽ അഡ്വ എസ് ജയസൂര്യയൻ അഭ്യർത്ഥിച്ചു.
