തൃശൂര്: ജനസമ്പര്ക്ക പരിപാടിക്കിടെ സുരേഷ് ഗോപി എംപി സ്വീകരിക്കാതെ മടക്കിയ കൊച്ചു വേലായുധന്റെ നിവേദനം വീട്ടിലെത്തി കൈപ്പറ്റി നാട്ടിക എംഎല്എ സി സി മുകുന്ദന്.
ഞായറാഴ്ചയാണ് സി സി മുകുന്ദന് എംഎല്എ കൊച്ചു വേലായുധന്റെ വീട്ടിലെത്തിയത്. വീടിന്റെ ശോചനീയവസ്ഥ പരിഹരിക്കാന് ഇടപെടണം എന്നായിരുന്നു കൊച്ചു വേലായുധന്റെ നിവേദനത്തിലെ ആവശ്യം.
കൊച്ചു വേലായുധന്റെ വീടിന്റെ ബുദ്ധിമുട്ടുകള്ക്ക് ഉടന് പരിഹാരം കാണുമെന്നും എംഎല്എ അറിയിച്ചു. എംഎല്എ യോടൊപ്പം സിപിഐ ചേര്പ്പ് മണ്ഡലം സെക്രട്ടറി കെ കെ ജോബി , ഗ്രാമപഞ്ചായത്ത് അംഗം ഷില്ലി ജിജുമോന് എന്നിവര് കൂടെ ഉണ്ടായിരുന്നു.
അതേസമയം, കൊച്ചുവേലായുധന് വീട് നിര്മിച്ചു നല്കുമെന്ന് സിപിഎം ജില്ലാ നേതൃത്വം അറിയിച്ചു. ജില്ലാ സെക്രട്ടറി കെ വി അബ്ദുല് ഖാദര് വീട്ടിലെത്തി വേലായുധന് ഉറപ്പ് നല്കി. ഉടന് വീട് നിര്മാണം തുടങ്ങുമെന്ന് അബ്ദുല് ഖാദര് പറഞ്ഞു.
