തിരുവനന്തപുരം: എല്‍പിഎസ്ടി ഉദ്യോഗാർഥി പ്രതിഷേധം കടുക്കുമ്പോള്‍ ചികിത്സയുമായി സഹകരിക്കാതെ വളർമതി. വളർമതി നിലവില്‍ ഐസിയുവിലാണ്.വാർഡിലേക്ക് മാറ്റിയാല്‍ മാത്രം ചികിത്സയുമായി സഹകരിക്കുമെന്നാണ് വളർമതി അറിയിച്ചിട്ടുള്ളത്. എല്‍പിഎസ്ടി ഉദ്യോഗാർഥികളുടെ സെക്രട്ടറിയേറ്റ് പടിക്കലിലെ സമരപ്പന്തല്‍ രാത്രിയെത്തിയാണ് പൊലീസ് പൊളിച്ചുമാറ്റിയത്. തുടർന്ന് നിരാഹാര സമരം നടത്തുന്ന വളര്‍മതിയെ അറസ്റ്റ് ചെയ്ത് ആശുപത്രിയിലേക്ക് മാറ്റുകയായിരുന്നു.
അതേസമയം, പൊലീസ് നടപടിക്കെതിരെ ഡിവൈഎഫ്‌ഐ രംഗത്തെത്തി. ബലപ്രയോഗത്തിലൂടെയാണ് സമരക്കാരെ മാറ്റാന്‍ ശ്രമിച്ചതെന്ന് ഉദ്യോഗാര്‍ഥികള്‍ ആരോപിച്ചു. ആവശ്യം നേടിയെടുത്തിട്ടേ പോകൂവെന്നും ഉദ്യോഗാര്‍ഥികള്‍ പറഞ്ഞു. സമരപ്പന്തല്‍ പൊളിച്ചുനീക്കുന്നത് സംബന്ധിച്ച്‌ പൊലീസ് നോട്ടീസ് നല്‍കുകയും വളര്‍മതിക്കെതിരെ കേസെടുക്കുകയും ചെയ്തിരുന്നു. സമരപ്പന്തല്‍ പൊളിച്ചുനീക്കില്ലെന്ന് സമരക്കാര്‍ അറിയിച്ചിരുന്നു. പന്തലില്ലെങ്കിലും സമരം തുടരുമെന്നും അവര്‍ പറഞ്ഞു. മന്ത്രി ഒ ജെ ജനീഷ് നടത്തിയ ജാഥക്ക് നേരെ സമരക്കാര്‍ പ്ലക്കാര്‍ഡ് ഉയര്‍ത്തി പ്രതിഷേധിച്ചിരുന്നു. പിന്നാലെയാണ് പൊലീസ് എത്തി സമരപ്പന്തല്‍ പൊളിച്ചത്.
ഹൈക്കോടതി നിർദേശപ്രകാരമാണ് പന്തല്‍ പൊളിച്ചതെന്നും സ്ഥിരം പന്തലാണ് നീക്കിയതെന്നും താല്‍ക്കാലിക പന്തല്‍ പൊളിച്ചില്ലെന്നും പൊലീസ് വിശദീകരിച്ചു. സമരത്തിന് നേതൃത്വം നല്‍കിയ വളർമതിയെ പോലീസ് അറസ്റ്റ് ചെയ്ത് നീക്കിയതിനെ തുടർന്ന്, വളർമതിക്ക് പകരം ജയകൃഷ്ണൻ ഇപ്പോള്‍ മുതല്‍ നിരാഹാര സമരം ആരംഭിക്കുമെന്ന് അറിയിച്ചു. നിലവില്‍ സ്ഥലത്തുനിന്ന് പൊലീസ് സംഘം മടങ്ങിയിട്ടുണ്ട്.
പൊലീസ് നടപടിക്ക് പിന്നാലെ എത്തിയ ഡിവൈഎഫ്‌ഐ പ്രവര്‍ത്തകര്‍ മന്ത്രി ജനീഷിന്‍റെ ജാഥ ഫ്ലക്സുകള്‍ തകർത്തു. സിപിഎം നേതാക്കളായ സി.എസ്. സുജാത, പി.കെ. ബിജു എന്നിവരും സമരസ്ഥലത്തെത്തി. പ്രസ്താവനയുമായി പ്രതിപക്ഷ നേതാവ് പിണറായി വിജയനും രംഗത്തെത്തി. ഇന്നുമുതല്‍ സമരപ്പന്തലില്‍ യുവമോർച്ച പ്രവർത്തകരും പ്രതിഷേധിക്കും. വളർമതി തിരിച്ചെത്തുന്നതുവരെ സമരപ്പന്തലില്‍ തുടരുമെന്നാണ് യുവമോർച്ച പ്രവർത്തകർ അറിയിച്ചിട്ടുള്ളത്.
