ആലപ്പുഴ: അവധിക്കായി ഗൾഫിൽ നിന്ന് നാട്ടിലെത്തിയ ശേഷം കഞ്ചാവ് ഉപയോഗിക്കുകയും വിൽപ്പന നടത്തുകയും ചെയ്ത യുവാവിനെ ആലപ്പുഴയിൽ വെച്ച് ജില്ലാ ലഹരി വിരുദ്ധ സ്ക്വാഡും (ഡാൻസാഫ്) ആലപ്പുഴ നോർത്ത് പോലീസും ചേർന്ന് പിടികൂടി. ആറാട്ടുവഴി ഫാത്തിമ ഗാർഡൻസിൽ താമസിക്കുന്ന സിയാദ് ഷിഹാബുദ്ദീൻ (33) ആണ് അറസ്റ്റിലായത്.
കഞ്ചാവ് ഉപയോഗവും വിൽപ്പനയും നടക്കുന്നുണ്ടെന്ന ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തെ തുടർന്ന് ഇയാളുടെ വീട്ടിലും പരിസരത്തും വിശദമായ പരിശോധന നടത്തി. ഈ പരിശോധനയിലാണ് നിരോധിത ലഹരി വസ്തുക്കൾ കണ്ടെത്തിയത്.
വീടിനോട് ചേർന്ന സ്റ്റെയർകേസിന് താഴെ ആരുടെയും ശ്രദ്ധയിൽപ്പെടാത്ത രീതിയിൽ ഒളിപ്പിച്ച നിലയിൽ, ഏകദേശം 60 സെന്റിമീറ്റർ നീളത്തിൽ വളർന്ന കഞ്ചാവ് ചെടി പോലീസ് കണ്ടെടുത്തു. കൂടാതെ, വീടിനുള്ളിൽ നടത്തിയ തിരച്ചിലിൽ 40 ഗ്രാം കഞ്ചാവും പിടിച്ചെടുത്തു.
