ഗാസിയാബാദ്: ഉത്തര്പ്രദേശിലെ ഗാസിയാബാദില് സഹോദരിമാരായ പെണ്കുട്ടികള് ആത്മഹത്യ ചെയ്തു. കുട്ടികളുടെ മരണത്തിന് പിന്നില് മൊബൈല് ഗെയിമുകളോടുള്ള ആസക്തിയെന്ന് റിപ്പോര്ട്ട്. ചേതന് കുമാര് എന്നയാളുടെ മക്കളായ നിഷിക (16), പ്രാചി (14), പഖി (12) എന്നിവരാണ് മരിച്ചത്. സാഹിബാബാദിനെ ടീല മോര് പൊലീസ് സ്റ്റേഷന് പരിധിയിലുള്ള ഭാരത് സിറ്റിയിലെ ബഹുനില കെട്ടിടത്തിലെ ഒമ്പതാം നിലയിലെ ഫ്ളാറ്റിലെ ബാല്ക്കണിയില് നിന്ന് ചാടിയാണ് കുട്ടികള് ജീവനൊടുക്കിയത്.
കുട്ടികളുടെ മരണം സംബന്ധിച്ച പ്രാഥമിക അന്വേഷണത്തിലാണ് മൂവര്ക്കും മൊബൈല് ഗെയിമുകളോടുള്ള ആസക്തി സംബന്ധിച്ച സൂചനകള് ലഭിച്ചത്. ഇന്ന് പുലര്ച്ച 12.30 ഓടെയായിരുന്നു സംഭവം. കെട്ടിടത്തിന്റെ ബാല്ക്കണിയിലേക്ക് കസേര ഉപയോഗിച്ച് കയറിയ ശേഷം കുട്ടികള് ഓരോരുത്തരായി ചാടുകയായിരുന്നു എന്നാണ് വിലയിരുത്തല്. ഗുരുതരമായി പരിക്കേറ്റ കുട്ടികളെ ആശുപത്രിയില് പ്രവേശിപ്പിച്ചെങ്കിലും മരിക്കുകയായിരുന്നു.
