ഈരാറ്റുപേട്ട: കടപുഴയാറ്റിൽ കുളിക്കാനിറങ്ങിയ യുവാവ് ചുഴിയിൽപ്പെട്ട് മുങ്ങിമരിച്ചു. തിരുവനന്തപുരം പാപ്പനംകോട് പാറയിൽകടവ് റോഡ്, ബലസാറസ് ചിറ ഒന്ന് വീട്ടിൽ ബി.എസ്. സുനിലിന്റെ മകൻ എ.ബി. അർജുൻ (28) ആണ് മരണപ്പെട്ടത്. എറണാകുളം ടെക്നോപാർക്കിലെ ഐടി ജീവനക്കാരനാണ്. ഇന്ന് ഉച്ചയ്ക്ക് രണ്ട് മണിയോടെയാണ് നാടിനെ നടുക്കിയ ഈ ദാരുണ അപകടമുണ്ടായത്. സുഹൃത്തിനൊപ്പം സ്ഥലം സന്ദർശിക്കുവാനായി എത്തിയതായിരുന്നു അർജുൻ. ആറ്റിലെ കാഴ്ചകൾ കണ്ട ശേഷം അർജുൻ മാത്രം ആറ്റിൽ കുളിക്കാനായി ഇറങ്ങുകയായിരുന്നു. എന്നാൽ കുളിക്കുന്നതിനിടെ അപ്രതീക്ഷിതമായി ഇയാൾ ആറ്റിലെ ശക്തമായ ചുഴിയിൽ അകപ്പെടുകയായിരുന്നു.
അർജുൻ ആറ്റിലെ ചുഴിയിൽപ്പെട്ട് മുങ്ങിത്താഴുന്നത് ഒപ്പമുണ്ടായിരുന്ന സുഹൃത്ത് കാണുകയായിരുന്നു. ഉടൻ തന്നെ സുഹൃത്ത് ഓടി സമീപത്തെ കടയിലെത്തി ആളുകളെ വിവരം അറിയിച്ചു. തുടർന്ന് നാട്ടുകാരും വിവരമറിഞ്ഞ് ഈരാറ്റുപേട്ട അഗ്നിരക്ഷാസേനയും മേലുകാവ് പോലീസും സന്നദ്ധസംഘടനാ പ്രവർത്തകരും ഉടനടി സ്ഥലത്തെത്തി സംയുക്തമായി തിരച്ചിൽ ആരംഭിച്ചു.
തീവ്രശ്രമത്തിനൊടുവിൽ അർജുനെ ആറ്റിൽ നിന്നും കണ്ടെത്തി പുറത്തെടുത്ത് ഉടൻ തന്നെ ആശുപത്രിയിൽ എത്തിച്ചുവെങ്കിലും അപ്പോഴേക്കും ജീവൻ രക്ഷിക്കാനായിരുന്നില്ല. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്മോർട്ടത്തിനായി മാറ്റി. പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകും. മേലുകാവ് പോലീസ് സംഭവത്തിൽ കേസ് രജിസ്റ്റർ ചെയ്തിട്ടുണ്ട്.
