കോന്നി: പത്തനംതിട്ട കോന്നി പയ്യനാമൺ ചെങ്കുളത്ത് പാറമടയിൽ അപകടം. ഹിറ്റാച്ചിക്ക് മുകളിൽ പാറ വീണാണ് അപകടം ഉണ്ടായത്. തൊഴിലാളികൾ കുടുങ്ങിക്കിടക്കുന്നതായാണ് പ്രാഥമിക വിവരം. ഇവരെ പുറത്തെടുക്കാൻ ശ്രമം തുടങ്ങി
ഒഡീഷ സ്വദേശിയായ ഒരാളും ബീഹാർ സ്വദേശിയായ മറ്റൊരാളുമാണ് കുടുങ്ങിക്കിടക്കുന്നതെന്നാണ് ലഭ്യമായ വിവരം. ഹിറ്റാച്ചി ഓപ്പറേറ്ററും സഹായിയുമാണ് കുടുങ്ങിക്കിടക്കുന്നത്. മഹാദേവ്(51) അജയ് റായ് (38) എന്നിവരാണ് കുടുങ്ങിക്കിടക്കുന്നതെന്നാണ് പ്രാഥമിക വിവരം. കൂടുതൽ പേർ കുടുങ്ങിക്കിടപ്പുണ്ടോ എന്നതുൾപ്പെടെയുള്ള കാര്യങ്ങൾ പരിശോധിച്ച് വരികയാണ്. സ്ഥലത്ത് രക്ഷാപ്രവർത്തനം ആരംഭിക്കാനായിട്ടില്ല. സ്ഥലത്തേക്ക് ക്രയിൻ എത്തിക്കാനുള്ള ശ്രമങ്ങൾ നടന്നുവരികയാണ്.
ഉച്ചഭക്ഷണം കഴിച്ച് ഷിഫ്റ്റ് പ്രകാരം ജോലിക്ക് കയറിയവരാണ് അപകടത്തിൽപ്പെട്ടത്ത് എന്നാണ് ലഭിക്കുന്ന വിവരം. പാറമടയിൽ വഴി ശരിയാക്കാനായി ഹിറ്റാച്ചിയിൽ പോയ തൊഴിലാളികളാണ് അപകടത്തിൽപ്പെട്ടത് എന്നാണ് വിവരം. നിരവധി പാറകളാണ് ഹിറ്റാച്ചിക്ക് മുകളിലേക്ക് വീണു കിടക്കുന്നത്. രക്ഷാപ്രവർത്തനം ദുഷ്കരമാണ്. അപകടം നടന്ന സ്ഥലത്തേക്ക് വാഹനം എത്തിച്ചേരാനോ കാൽനടയായി എത്തിച്ചേരാനോ ഏറെ പ്രയാസമാണ്. അപകടത്തിന്റെ വിവരം അറിഞ്ഞ് പോലീസും ഫയർ ഫോഴ്സും ഉൾപ്പെടെ സ്ഥലത്ത് എത്തിയെങ്കിലും രക്ഷാപ്രവർത്തനം ആരംഭിക്കാൻ കഴിഞ്ഞിട്ടില്ല.
