മരിയ ഗീതങ്ങൾ ഉണർന്നു :ആ അമ്മമരത്തണലിന്റെ കുളിർമയുടെ നിറസാന്നിധ്യം അനുഭവിച്ചറിയാം:പാലാ ഗ്വാഡ ലൂപ്പെ മാതാവിന്റെ തിരുന്നാളിന് ഇന്ന് കൊടിയേറും

പാലാ :മുന്നിലുള്ള സമ്മിശ്രങ്ങളായ ജീവിതസാഹചര്യങ്ങളിൽ പ്രത്യാശ കൈവിടാതെ തീർത്ഥാടനം ചെയ്യാൻ ഈ ജൂബിലിവർഷത്തിൽ പരിശുദ്ധ ഗ്വാഡലൂപ്പെ അമ്മയുടെ കരം പിടിക്കാം. ആ അമ്മമരത്തണലിന്റെ കുളിർമയുടെ നിറസാന്നിധ്യം അനുഭവിച്ചറിയാം. ഏഷ്യയിൽ ആദ്യമായി പരിശുദ്ധ ഗ്വാഡലൂപ്പെ മാതാവിൻ്റെ നാമത്തിൽ സ്ഥാപിതമായതും പരിശുദ്ധമാതാവ് പ്രത്യക്ഷദർശനം അരുളിയ മെക്‌സിക്കോയിൽനിന്നുള്ള തിരുസ്വരൂപം പ്രതിഷ്‌ഠിക്കപ്പെട്ടതുമായ പരിശുദ്ധ ഗ്വാഡലൂപ്പെ മാതാ ഇടവകദൈവാലയത്തിൽ മദ്ധ്യസ്ഥത്തിരുനാൾ ഈ വർഷം 2025 ഡിസംബർ 3 ബുധൻ മുതൽ 12 വെള്ളി വരെ ഭക്തിനിർഭരമായി ആഘോഷിക്കുന്നു. തിരുനാളിനൊരുക്കമായി ബ്രദർ  പാപ്പച്ചൻ പള്ളത്ത് നയിക്കുന്ന ആത്മീയ ഉണർവേകുന്ന ഗ്വാഡലൂപ്പെ കൺവൻഷൻ നവംബർ 29, 30, ഡിസംബർ 1, 2 (ശനി, ഞായർ, തിങ്കൾ, ചൊവ്വ) തീയതികളിൽ നടത്തപ്പെട്ടു . ആത്മീയാഘോഷത്തിൻ്റെ ദിനങ്ങൾ തുടരുകയാണ്.

പരിശുദ്ധ ഗ്വാഡലൂപ്പാ മാതാ റോമൻ കത്തോലിക്കാ ദേവാലയത്തിലെ പരിശുദ്ധ കന്യകാ മാതാവിന്റെ മാധ്യസ്ഥ തിരുന്നാളിന് ആരംഭം കുറിച്ച് ഇന്ന്(ഡിസംബർ 3 ) ഉച്ചയ്ക്ക് 12 ന് കൊടിയേറും. കൂട്ടായ്മകളിൽ പ്രയാണം നടത്തുന്ന പരിശുദ്ധ മാതാവിന്റെ തിരുസ്വരൂപങ്ങൾ രാവിലെ 10:45 ന് പാലാ ഗവണ്മെന്റ് ആശുപത്രി ജംഗ്ഷനിൽ സംഗമിച്ച് വാദ്യമേളങ്ങളോടെ പതാകയും വഹിച്ചുകൊണ്ടുള്ള പ്രദക്ഷിണത്തിന് പള്ളിയിൽ എത്തുമ്പോൾ സ്വീകരണം നൽകും.

തുടർന്ന് ജപമാല,തിരുനാൾ കൊടിയേറ്റ് , ദിവ്യബലി, പ്രസംഗം, നൊവേന. പട്ടിത്താനം ഫോറോന വികാരി ഫാ. അഗസ്റ്റിൻ കല്ലറക്കൽ മുഖ്യ കാർമികത്വം വഹിക്കും. ഇന്ന് പരേത സ്മരണ ദിനമായി കൂടി ആചരിക്കുന്നു. പരേതർക്ക് വേണ്ടിയുള്ള ഒപ്പീസ്  വികാരി ഫാ.ജോഷി പുതുപ്പറമ്പിൽ നിർവഹിക്കും.നാളെ നാലാം തീയതി ആത്മാഭിഷേക ദിനമായാണ് ആചരിക്കുന്നത്.