Kerala
മുത്തശ്ശിക്കൊപ്പം സ്റ്റേഷനില് എത്തിയ പതിനാറുകാരനെ എസ്ഐ മുഖത്ത് അടിച്ചതായി പരാതി
കൊച്ചി: സ്റ്റേഷനില്വെച്ച് എസ്ഐ 16കാരന്റെ മുഖത്തടിച്ചതായി പരാതി. ഞാറക്കല് സ്റ്റേഷനിലെ എസ്ഐ അരുണ് എ എസിനെതിരെയാണ് കുട്ടിയുടെ പിതാവ് പരാതി നല്കിയിരിക്കുന്നത്. മുത്തശ്ശിക്കൊപ്പം സ്റ്റേഷനില് എത്തിയ 16കാരനെ അകാരണമായി എസ്ഐ മർദ്ദിച്ചു എന്നാണ് പരാതിയില് പറയുന്നത്.
തന്റെ മാല നഷ്ടപ്പെട്ടു എന്ന് കാട്ടി ഒരു വീട്ടമ്മ ഞാറക്കല് പൊലീസ് സ്റ്റേഷനില് കഴിഞ്ഞ ദിവസം പരാതി നല്കിയിരുന്നു. ഇതില് അന്വേഷണം നടത്തിയ പൊലീസ് പരിസരത്തെ ഓട്ടോ ഡ്രൈവര്മാരോട് സംസാരിച്ചതിനെ തുടര്ന്നാണ് കുട്ടിയുടെ മുത്തശ്ശിയെ സ്റ്റേഷനില് വിളിച്ച് വരുത്തുന്നത്.
ഇവര് ആ പരിസരത്ത് നിന്ന് എന്തോ എടുക്കുന്നത് കണ്ടു എന്നായിരുന്നു ഒട്ടോ ഡ്രൈവര്മാരുടെ മൊഴി. ഞാറക്കല് വെളിയത്താന്പറമ്പ് ജംഗ്ഷനിലായിരുന്നു സംഭവം.
എന്നാല് താന് ബാങ്കിലേക്ക് പോകും വഴി കയ്യിലുണ്ടായിരുന്ന പണം താഴെ വീണെന്നും ഇതാണ് എടുത്തതെന്നും വയോധിക വിശദീകരിച്ചിരുന്നു.