Kerala
മണ്ഡല പുനര്നിര്ണയം: രാജ്യത്തിന്റെ ഫെഡറല് സംവിധാനത്തെ അട്ടിമറിക്കാനുള്ള നീക്കമെന്ന് മുഖ്യമന്ത്രി
തിരുവനന്തപുരം: മണ്ഡല പുനര്നിര്ണയത്തിന് എതിരെ മുഖ്യമന്ത്രി പിണറായി വിജയന്. മണ്ഡല പുനര്നിര്ണയം എന്ന പേരില് കേന്ദ്ര സര്ക്കാര് ധൃതിയില് നടത്താന് ശ്രമിക്കുന്നത് സാധാരണ ഭരണപരിഷ്കാരം എന്ന നിലയില് ചുരുക്കി കാണാനാവില്ലെന്ന് മുഖ്യമന്ത്രി പറഞ്ഞു.
അത് രാജ്യത്തിന്റെ ഫെഡറല് സംവിധാനത്തെ തന്നെ അട്ടിമറിക്കാനുള്ള നീക്കമാണ് എന്ന ഗുരുതരമായ സംശയമാണ് ഉയര്ന്നിട്ടുള്ളതെന്നും അദ്ദേഹം കൂട്ടിച്ചേര്ത്തു.
‘പാര്ലമെന്റിന്റെ പ്രത്യേക സമ്മേളനത്തില് അവതരിപ്പിക്കപ്പെടുന്ന ബില്ലും 2011ലെ സെന്സസ് അടിസ്ഥാനമാക്കി മുന്നോട്ടുവെക്കുന്ന അതിലെ നിര്ദ്ദേശങ്ങളും സംസ്ഥാനങ്ങളുടെ അവകാശങ്ങളെയും തുല്യനീതിയേയും സാരമായി ബാധിക്കുന്നതാണ്. സംസ്ഥാനങ്ങളുമായി സമവായത്തില് എത്താതെയാണ് ഇത്തരം നിര്ണായക വിഷയത്തില് കേന്ദ്രം മുന്നോട്ട് പോകുന്നത് എന്നതുതന്നെ ആശങ്കാജനകമാണ്’, മുഖ്യമന്ത്രി പറഞ്ഞു.