Kerala
മുനമ്പം തര്ക്ക ഭൂമി; സംസ്ഥാന വഖഫ് ബോര്ഡിന് കേന്ദ്ര സര്ക്കാരിന്റെ നോട്ടീസ്
എറണാകുളം: സംസ്ഥാന വഖഫ് ബോര്ഡിന് കേന്ദ്ര സര്ക്കാരിന്റെ നോട്ടീസ്. മുനമ്പം തര്ക്ക ഭൂമി ഉമീദ് പോര്ട്ടലില് രജിസ്റ്റര് ചെയ്തതില് വിശദീകരണം തേടിയാണ് നോട്ടീസ്. അഞ്ച് ദിവസത്തിനുള്ളില് മറുപടി നല്കണമെന്നാണ് നിര്ദേശം.
ഉമീദ് പോര്ട്ടലില് നിന്ന് തര്ക്ക ഭൂമി നീക്കണമെന്ന് ബിജെപി ആവശ്യപ്പെട്ടിരുന്നു. പിന്നാലെ ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് കേന്ദ്ര വഖഫ് മന്ത്രി കിരണ് റിജിജുവിന് കത്ത് നല്കിയിരുന്നു.
മുനമ്പത്തെ തര്ക്ക ഭൂമി നിയമവിരുദ്ധമായാണ് ഉമീദ് പോര്ട്ടലില് ഉള്പ്പെടുത്തിയതെന്ന് നേരത്തെ തന്നെ ആക്ഷേപമുണ്ടായിരുന്നു. ഇതോടെ പോര്ട്ടിലില് നിന്നും ഭൂമി നീക്കം ചെയ്യണമെന്ന് ആവശ്യം ഉയര്ന്നു.
ഉമീദ് പോര്ട്ടലില് രജിസ്റ്റര് ചെയ്തിട്ടുണ്ടെങ്കില് അത് വഖഫ് ഭൂമിയായി അംഗീകരിക്കേണ്ടി വരികയും അവിടെയുള്ളവര്ക്ക് ഭൂമി വിട്ടു പോകേണ്ട അവസ്ഥ ഉണ്ടാകുകയും ചെയ്യും. ഇതോടെയാണ് ബിജെപി സംസ്ഥാന അധ്യക്ഷന് കേന്ദ്ര മന്ത്രിക്ക് കത്തുനല്കിയത്. ഈ പരാതി പരിഗണിച്ചുകൊണ്ടാണ് വിശദീകരണം ആവശ്യപ്പെട്ടിരിക്കുന്നത്.