Kerala
തളിപ്പറമ്പിലെ സ്ഥാനാര്ഥി നിര്ണയത്തില് എം വി ഗോവിന്ദനെതിരെ ഒളിയമ്പുമായി എംഎ ബേബി
തളിപ്പറമ്പിലെ സ്ഥാനാര്ഥി നിര്ണയത്തില് സിപിഐഎം സംസ്ഥാന സെക്രട്ടറി എം വി ഗോവിന്ദനെതിരെ ഒളിയമ്പുമായി സിപിഐഎം ജനറല് സെക്രട്ടറി എംഎ ബേബി.
അര്ഹതയുണ്ടെങ്കിലും ബന്ധുവായ ഒരാളെ സ്ഥാനാര്ഥിയാക്കുന്നത് പാര്ട്ടിയെ കടന്നാക്രമിക്കാന് അവസരം നല്കുമെങ്കില് ആ സ്ഥാനാര്ഥിത്വം നേതാക്കള് ഒഴിവാക്കേണ്ടതായിരുന്നുവെന്നും എം എ ബേബി പറഞ്ഞു. മലപ്പുറത്ത് ഇഎംഎസിന്റെ ലോകം സെമിനാറിലായിരുന്നു ബേബിയുടെ പ്രതികരണം.
ഒരാള് സ്വന്തം അര്ഹത കൊണ്ട് സ്ഥാനാര്ത്ഥിയാകുമ്പോള് അവരുടെ ബന്ധുത്വം പറഞ്ഞ് ബൂര്ഷ്വാ മാധ്യമങ്ങള് കടന്നാക്രമിക്കാറുണ്ട്. അത്തരം പ്രചാരണങ്ങളുടെ പിന്നാലെ പാര്ട്ടി പോകേണ്ടതില്ല.
എന്നാല് ഒരു നേതാവുമായി ബന്ധപ്പട്ട ഒരാളെ സ്ഥാനാര്ഥിയാക്കുന്നത് പാര്ട്ടിയെ മൊത്തത്തില് കടന്നാക്രമിക്കാന് മാധ്യമങ്ങള്ക്ക് അവസരം നല്കുമെന്ന് തോന്നുകയാണെങ്കില് അത് ഒഴിവാക്കാനുള്ള ഔചിത്യം ബന്ധപ്പെട്ട നേതാവ് തന്നെ കാണിക്കണമായിരുന്നുവെന്ന് അദ്ദേഹം പറഞ്ഞു.
അവിടെ താനുമായി ബന്ധപ്പെട്ട ഒരാള്ക്ക് പകരം മറ്റൊരാള് മതി എന്ന് തീരുമാനിക്കാന് നേതാവ് തന്നെ മുന്കൈ എടുക്കുന്നതാണ് ശരിയായ രീതി.
കണ്ണൂരില് ഉണ്ടായ ഒരു സ്ഥാനാര്ത്ഥിത്വത്തിന്റെ കാര്യത്തില് വേണ്ടത്ര ശ്രദ്ധ ഉണ്ടായില്ലെന്ന സ്വയം വിമര്ശനം കണ്ണൂര് ജില്ലാ കമ്മറ്റി നടത്തുകയും അത് സംസ്ഥാന കമ്മിറ്റി അംഗീകരിക്കുകയും ചെയ്തിട്ടുണ്ടെന്നും എം എ ബേബി പറഞ്ഞു.