Kerala
കേരള കോണ്ഗ്രസ് ഇടതു മുന്നണി വിടില്ല; സിപിഐ
കേരള കോണ്ഗ്രസ് എം മുന്നണി മാറുമെന്ന അഭ്യൂഹങ്ങള് തള്ളി സിപിഐ സംസ്ഥാന സെക്രട്ടറി ബിനോയ് വിശ്വം. ഇന്നലെ മുന്നണി വിടില്ലെന്നാണ് ജോസ് മാധ്യമങ്ങളോട് പറഞ്ഞത്. ആ വാക്ക് വിശ്വസിക്കുകയാണ് എന്നും ബിനോയ് വിശ്വം പറഞ്ഞു. ഇന്നലെ രാത്രിയും ജോസ് കെ മാണിയുമായി സംസാരിച്ചിരുന്നു. ഒരു പാര്ട്ടിയുടെ ചെയര്മാന് നിലപാട് പറയുമ്പോള് അതില് അവിശ്വാസം കാണേണ്ട കാര്യമില്ല. കേരള കോണ്ഗ്രസിന് മുന്നണി വിടേണ്ട കാര്യമില്ലെന്നും ബിനോയ് വിശ്വം പറഞ്ഞു.
ഇടതു മുന്നണിയില് ഉറച്ച് നില്ക്കും എന്ന് ജോസ് കെ മാണി പറയുമ്പോഴും ചര്ച്ചകള് സജീവമാണ്. നാളെ ചേരുന്ന സ്റ്റിയറിങ് കമ്മിറ്റി യോഗത്തില് ഇക്കാര്യത്തില് വിശദമായ ചര്ച്ച നടക്കും. ജോസ് കെ മാണിക്ക് യുഡിഎഫ് പ്രവേശനത്തില് അനുകൂല നിലപാടാണ് എങ്കിലും മന്ത്രി റോഷി അഗസ്റ്റിന്റെ എതിര്പ്പാണ് തീരുമാനം വൈകിപ്പിക്കുന്നത്. സമവായം ഉണ്ടാകാതെ മുന്നണി മാറ്റത്തിലേക്ക് പോയാല് അത് പിളര്പ്പിലേക്ക് നയിക്കും. പാര്ട്ടിയെ അത് തളര്ത്തുകയും ചെയ്യും. അതാണ് ജോസ് കെ മാണിയെ ചിന്തിപ്പിക്കുന്നത്