Kerala
കളമശ്ശേരി പോളിയിൽ എത്തിച്ചത് നാല് കിലോ കഞ്ചാവെന്ന് പ്രതികളുടെ മൊഴി
കൊച്ചി: കളമശ്ശേരി പോളിടെക്നിക് കോളേജിലെ ആൺകുട്ടികളുടെ ഹോസ്റ്റലിൽ നിന്ന് കഞ്ചാവ് കണ്ടെത്തിയ കേസില് കൂടുതല് വിവരങ്ങള് പുറത്ത്. ഹോസ്റ്റലില് എത്തിച്ചത് നാല് കിലോ കഞ്ചാവെന്ന് പ്രതികള് മൊഴി നല്കി. എന്നാല് പൊലീസ് കണ്ടെത്തിയത് രണ്ട് കിലോയാണ്. ബാക്കി രണ്ട് കിലോ കഞ്ചാവ് സമീപത്തെ വിദ്യാഭ്യാസ സ്ഥാപനങ്ങളില് വില്പ്പന നടത്തിയെന്നാണ് സൂചന.
അതേസമയം കഴിഞ്ഞ ദിവസം രാത്രി കുസാറ്റിന് സമീപത്തെ ഹോസ്റ്റലുകളില് പൊലീസ് പരിശോധന നടത്തി. നാല് പേരില് നിന്ന് കഞ്ചാവ് കണ്ടെത്തി. പ്രൈവറ്റ് ഹോസ്റ്റലുകളിലും പിജികളിലുമായിരുന്നു പരിശോധന നടത്തിയത്. കൊച്ചി നഗരത്തിലും രാത്രി വ്യാപക പരിശോധന നടത്തിയിരുന്നു. വാഹന പരിശോധനയില് മൂന്നുപേരെ കഞ്ചാവുമായും 11 പേരെ മദ്യപിച്ച് വാഹനമോടിച്ചതിന്റെ പേരിലും പൊലീസ് പിടികൂടി.