Kerala
സംസ്ഥാനത്ത് സ്വർണവില ഒറ്റയടിക്ക് 2920 രൂപ വര്ധിച്ചു
കൊച്ചി: ഇറാനുമായുള്ള യുദ്ധം അവസാനിക്കുമെന്ന പ്രതീക്ഷ നല്കി വെടിനിര്ത്തല് നീട്ടി അമേരിക്കന് പ്രസിഡന്റ് ഡോണള്ഡ് ട്രംപ് നടത്തിയ പ്രഖ്യാപനത്തിന്റെ ചുവടുപിടിച്ച് സംസ്ഥാനത്ത് സ്വര്ണവിലയില് മുന്നേറ്റം.
ഇന്ന് പവന് ഒറ്റയടിക്ക് 2920 രൂപയാണ് വര്ധിച്ചത്. 1,12,800 രൂപയാണ് പുതിയ സ്വര്ണവില. ഗ്രാമിന് ആനുപാതികമായി 365 രൂപയാണ് വര്ധിച്ചത്. 14,100 രൂപയാണ് ഒരു ഗ്രാം സ്വര്ണത്തിന്റെ വില.
പശ്ചിമേഷ്യന് സംഘര്ഷമാണ് പ്രധാനമായി സ്വര്ണവിലയെ സ്വാധീനിക്കുന്നത്. ഇതിനെ തുടര്ന്ന് എണ്ണവില കൂടുന്നതും കുറയുന്നതും സ്വര്ണവിലയെ സ്വാധീനിക്കുന്നുണ്ട്.
നിലവില് ഇന്ത്യ മുഖ്യമായി ആശ്രയിക്കുന്ന ബ്രെന്ഡ് ക്രൂഡിന്റെ വില ബാരലിന് 95 ഡോളറില് താഴെ എത്തി നില്ക്കുകയാണ്. ഇതാണ് സ്വര്ണവില ഉയരാന് കാരണമെന്നാണ് വിപണി വിദഗ്ധര് പറയുന്നത്.