വാടക, ഫർണിച്ചർ, വൈദ്യുതി ചാർജ് ഇനങ്ങളിലായി കാൽക്കോടിയോളം രൂപയാണ് ഔഷധിക്ക് ഇതിലൂടെ നഷ്ടമുണ്ടായത്.സർക്കാർ നിശ്ചയിച്ച നിരക്ക് നൽകി മാത്രമേ ഗെസ്റ്റ് ഹൗസ് ഉപയോഗിക്കാവൂ എന്ന ഔദ്യോഗിക ഉത്തരവ് ലംഘിച്ചായിരുന്നു ഈ താമസം.
ഇതേ കാലയളവിൽ ഔഷധിയുടെ പഞ്ചകർമ ആശുപത്രിയിലെ ഡീലക്സ് എസി മുറി ഉപയോഗിച്ച് ഇവർ സ്ഥാപനത്തിന്റെ ചെലവിൽ അനധികൃത സൗന്ദര്യ ചികിത്സ നടത്തിയതായും ആരോപണമുയർന്നിട്ടുണ്ട്. എന്നാൽ തനിക്കെതിരെയുള്ള സൗന്ദര്യ ചികിത്സാ വിവാദം വ്യാജമാണെന്ന് കാണിച്ച് ശോഭന ജോർജ് രംഗത്തെത്തിയിട്ടുണ്ട്.
ആശുപത്രിരേഖകളിൽ പേരോ വിവരങ്ങളോ ഉൾപ്പെടുത്താതെ 2002 ജൂലൈയിൽ ഔഷധിയിലെ ഡീലക്സ് എസി മുറിയിലായിരുന്നു സൗന്ദര്യചികിത്സ. ചെയർപഴ്‌സന് സൗജന്യചികിത്സാ ആനുകൂല്യമില്ല; ഔഷധിയുടെ പഞ്ചകർമ ആശുപത്രിയിൽ സൗന്ദര്യചികിത്സാരീതിയുമില്ല. ഒരുദിവസത്തെ ചികിത്സയ്ക്കായി മാത്രം 3 കിലോ ചെമ്പരത്തിപ്പൂമൊട്ട്, കോഴിമുട്ട, നാരങ്ങാനീര് എന്നിവ ഉപയോഗിച്ചു. ഈ മിശ്രിതം ഏലാദി വെളിച്ചെണ്ണ തേച്ചാണ് ഉപയോഗിച്ചത്. മുരിങ്ങയിലയും ഇളനീരും ചേർത്ത മിശ്രിതം, അരിപ്പൊടിയും ഓറഞ്ചുനീരും തൈരും ചേർത്ത മിശ്രിതം, ഫെയ്‌സ്‌പാക്കും പാലും റോസ് വാട്ടറും, മഞ്ഞൾ ബോഡിറാപ്പും നസ്യവും എന്നിങ്ങനെയായിരുന്നു ചികിത്സാരീതികൾ. ഇതിനെല്ലാം ഔഷധിയുടെ പണം ഉപയോഗിച്ചു എന്നാണ് ഇപ്പോൾ ഉണ്ടായിരിക്കുന്ന ആരോപണം .
