ലക്നൗ: ഉത്തർപ്രദേശിലെ അസംഗഢിൽ ഏഴാം വിവാഹത്തിനൊരുങ്ങുന്ന 55കാരനായ പിതാവിന്റെ വിവാഹം തടയണമെന്നാവശ്യപ്പെട്ട് പരാതിയുമായി മകൻ. 55 വയസ്സുള്ളപ്പോൾ, അയാൾ ഇതിനകം ആറ് തവണ വിവാഹം കഴിച്ചുവെന്ന പരാതിയാണ് മകൻ ഉയർത്തുന്നത്. ഏഴാമത്തെ വിവാഹനിശ്ചയത്തെക്കുറിച്ച് അറിഞ്ഞ അദ്ദേഹത്തിന്റെ പ്രായപൂർത്തിയാകാത്ത മകനാണ് വിവാഹം തടയണമെന്ന് ആവശ്യപ്പെട്ട് പോലീസിൽ അപേക്ഷിച്ചത്.
അത്രാലിയ പൊലീസ് സ്റ്റേഷൻ പരിധിയിലാണ് സംഭവം. കുടുംബത്തിന്റെ പക്കലുള്ള ബാക്കി ഭൂമി കൂടി വിറ്റ് വിവാഹം നടത്താനാണ് പിതാവിന്റെ നീക്കമെന്നും മകൻ ആരോപിച്ചു. പിതാവിന്റെ മൂന്നാം ഭാര്യയിലെ മകനാണ് പരാതിക്കാരൻ. ഇതുവരെ ആറ് വിവാഹങ്ങൾ കഴിച്ച പിതാവ്, ഏറ്റവും ഒടുവിൽ വിവാഹിതനായത് 2024ലാണെന്ന് പരാതിയിൽ പറയുന്നു.
