തിരുവനന്തപുരം: യൂത്ത് കോണ്ഗ്രസ് സംസ്ഥാന അധ്യക്ഷനെ നിയമിക്കുന്നതുമായി ബന്ധപ്പെട്ട ചര്ച്ചകള് ഊര്ജ്ജിതമായി. യൂത്ത് കോണ്ഗ്രസ് ദേശീയ ഭാരവാഹി ശ്രാവണ് റാവു കേരള നേതാക്കളെ കണ്ടു.
യൂത്ത് കോണ്ഗ്രസ് അധ്യക്ഷനെ സംബന്ധിച്ച് ഇതുവരെ സമവായമായിട്ടില്ല. തെരഞ്ഞെടുപ്പ് അടുത്തു വരുന്ന സാഹചര്യത്തില് യൂത്ത് കോണ്ഗ്രസ് അധ്യക്ഷനെ നിയമിക്കാതെ മുന്നോട്ടു പോകാനാകില്ലെന്ന് കോണ്ഗ്രസ് നേതാക്കള് സൂചിപ്പിച്ചു.
നിലവിലെ സംസ്ഥാന വൈസ് പ്രസിഡന്റ് അബിന് വര്ക്കി, കെഎസ് യു മുന് സംസ്ഥാന പ്രസിഡന്റ് കെ എം അഭിജിത്, ബിനു ചുള്ളിയില് തുടങ്ങിയവരുടെ പേരുകളാണ് ഉയര്ന്നു വന്നിട്ടുള്ളത്.
രമേശ് ചെന്നിത്തല അബിന് വര്ക്കിയെ പിന്തുണയ്ക്കുന്നു. കഴിഞ്ഞ തവണ നടന്ന തെരഞ്ഞെടുപ്പില് ഒന്നര ലക്ഷത്തിലേറെ വോട്ടു നേടിയ അബിനെ പ്രസിഡന്റ് ആക്കാതിരുന്നാല് സ്വാഭാവിക നീതി നിഷേധമാകുമെന്നാണ് ഐ ഗ്രൂപ്പ് വാദിക്കുന്നത്.
