ന്യൂഡൽഹി: ഡൽഹിയിൽ തുടർച്ചയായ രണ്ടു ദിവസം പെയ്ത മഴയിൽ വെള്ളക്കെട്ട് രൂക്ഷം. പലയിടങ്ങളിലും ഗതാഗതക്കുരുക്കും അനുഭവപ്പെട്ടു.
ഇന്ന് മഴ മുന്നറിയിപ്പ് പുറപ്പെടുവിച്ചില്ല എങ്കിലും സമാനമായ കാലാവസ്ഥ തുടരും എന്നും നേരിയതോ മിതമായതോ ആയ മഴയ്ക്ക് സാധ്യതയുണ്ട് എന്നും കാലാവസ്ഥാ വകുപ്പ് മുന്നറിയിപ്പ് നൽകി. വെള്ളിയാഴ്ച മുതൽ മഴയുടെ തീവ്രത കുറയാൻ സാധ്യത ഉണ്ടെന്നും അധികൃതർ അറിയിച്ചു.
രാവിലെ 8.30 വരെയുള്ള 24 മണിക്കൂറിനുള്ളിൽ സഫ്ദർജംഗ് കാലാവസ്ഥാ കേന്ദ്രത്തിൽ 14.4 മില്ലിമീറ്റർ മഴയാണ് രേഖപ്പെടുത്തിയത്. ലോധി റോഡിൽ 20.6 മില്ലിമീറ്റർ, പാലം കേന്ദ്രത്തിൽ 19 മില്ലിമീറ്റർ, റിഡ്ജിൽ 32.8 മില്ലിമീറ്റർ, പ്രഗതി മൈതാനിൽ 38.9 മില്ലിമീറ്റർ എന്നിങ്ങനെ മഴയും രേഖപ്പെടുത്തി. ജൂലൈയിൽ ഇതുവരെ 151.2 മില്ലിമീറ്റർ മഴയാണ് തലസ്ഥാന നഗരിയിൽ പെയ്തത്.
