Kerala
വർഗീയതയ്ക്കെതിരെ സന്ധിയില്ലാത്ത പോരാട്ടം, വി ഡി സതീശന് അഭിവാദ്യങ്ങൾ; പെരുന്നയിൽ ഫ്ളക്സ്
കോട്ടയം: പെരുന്നയില് പ്രതിപക്ഷ നേതാവ് വി ഡി സതീശന് അഭിവാദ്യം അര്പ്പിച്ചുകൊണ്ട് ഫ്ളക്സ് ഉയര്ന്നു. വര്ഗീയതയ്ക്കെതിരെ സന്ധിയില്ലാത്ത പോരാട്ടം നടത്തുന്ന വി ഡി സതീശന് അഭിവാദ്യങ്ങള് എന്നാണ് ഫ്ളക്സില് കുറിച്ചിരിക്കുന്നത്.
കെഎസ്യു, യൂത്ത് കോണ്ഗ്രസ്, സേവാദള് എന്നീ സംഘടനകളുടെ പേരിൽ എന്എസ്എസ് ആസ്ഥാനത്തിന് സമീപമാണ് ഫ്ളക്സ് ബോര്ഡുകള് സ്ഥാപിക്കപ്പെട്ടത്. പെരുന്ന മുതല് കണിച്ചുകുളങ്ങര വരെ ഇത്തരത്തില് ഫ്ളക്സ് വെക്കാനാണ് തീരുമാനമെന്ന് യൂത്ത് കോണ്ഗ്രസ് നേതാക്കള് അറിയിച്ചു.
എസ്എന്ഡിപി- എന്എസ്എസ് ഐക്യവുമായി ബന്ധപ്പെട്ട് ചര്ച്ചകള് നടക്കുമ്പോള് വി ഡി സതീശന്റെ വാക്കുകള് വ്യാപക ശ്രദ്ധ നേടിയിരുന്നു. ഐക്യം ഇന്നലെ പാളിയതോടെയാണ് സതീശന് അഭിവാദ്യമര്പ്പിച്ചുകൊണ്ട് ഫ്ളക്സ് ബോര്ഡ് ഉയര്ന്നത്.