Kerala
ദേവേന്ദുവിന്റെ മരണം, അമ്മാവന് ഹരികുമാറിന് മാനസികപ്രശ്നങ്ങള് ഇല്ലെന്ന് ഡോക്ടർ
തിരുവനന്തപുരം: കോട്ടുകാല്ക്കോണം സ്വദേശികളായ ശ്രീതുവിന്റെയും ശ്രീജിത്തിന്റെയും മകള് ദേവേന്ദുവിനെ വീട്ടുമുറ്റത്തെ കിണറ്റില് മരിച്ച നിലയില് കണ്ടെത്തിയിരുന്നു. സംഭവത്തിന് പിന്നാലെ ദേവേന്ദുവിനെ കിണറ്റിലെറിഞ്ഞു കൊലപ്പെടുത്തിയ കേസില് റിമാന്ഡിലാണ് അമ്മാവന് ഹരികുമാർ. ഹരികുമാറിന് മാനസികപ്രശ്നങ്ങള് ഇല്ലെന്ന് മെഡിക്കല് കോളജ് ആശുപത്രിയിലെ മാനസികരോഗ വിഭാഗം.
കോടതിയുടെ നിര്ദേശപ്രകാരം ഹരികുമാറിനെ പരിശോധിച്ച സൈക്യാട്രി വിഭാഗം വിദഗ്ധരാണ് ഇത്തരത്തില് പ്രാഥമിക നിഗമനത്തില് എത്തിയത്. രണ്ടു ദിവസത്തെ നിരീക്ഷണത്തിനു ശേഷം കോടതിയില് റിപ്പോര്ട്ട് നല്കും. ഹരികുമാറിനെ അഞ്ചു ദിവസത്തെ കസ്റ്റഡിയില് വേണമെന്നു പൊലീസ് ആവശ്യപ്പെട്ടെങ്കിലും കോടതി അത് അംഗീകരിച്ചിരുന്നില്ല.
കോടതിയില് മാനസിക അസ്വാസ്ഥ്യം പ്രകടിപ്പിച്ചതിനാല് മാനസിക രോഗവിദഗ്ധന്റെ സര്ട്ടിഫിക്കറ്റ് കോടതി ആവശ്യപ്പെട്ടു. ഇതിനായി ഇന്നലെ ഉച്ചയോടെ മെഡിക്കല് കോളജ് ആശുപത്രിയില് എത്തിച്ചെങ്കിലും സര്ട്ടിഫിക്കറ്റ് ലഭിച്ചിരുന്നില്ല. തുടര്ന്ന് ഇന്നാണു ഹരികുമാറിനെ പരിശോധനയ്ക്കു വിധേയമാക്കിയത്. കസ്റ്റഡി അപേക്ഷ പരിഗണിക്കവെ താനല്ല കുട്ടിയെ കൊലപ്പെടുത്തിയതെന്നു ഹരികുമാര് മൊഴിമാറ്റുകയും കരയുകയും ചികിത്സ ആവശ്യപ്പെടുകയും ചെയ്തിരുന്നു.