Kerala
തിരുവനന്തപുരത്ത് എഡിജിപി ഓഫീസിൽ തേനീച്ച ആക്രമണം; ഏഴുപേർക്ക് പരിക്ക്
തിരുവനന്തപുരം: നഗരത്തിലെ ക്രമസമാധാന ചുമതലയുള്ള എഡിജിപിയുടെ ഓഫീസിൽ തേനീച്ചകളുടെ ആക്രമണം. ഡ്യൂട്ടിയിലുണ്ടായിരുന്ന നാല് പൊലീസുകാർ ഉൾപ്പെടെ ആകെ ഏഴുപേർക്കാണ് കുത്തേറ്റത്.
പേരൂർക്കട എസ്.എ.പി ക്യാമ്പിന് സമീപം പ്രവർത്തിക്കുന്ന എ.ഡി.ജി.പി ഓഫീസിലാണ് സംഭവം നടന്നത്. ഓഫീസിന് മുകളിൽ കെട്ടിടത്തിൻ്റെ പുറംചുവരിൽ ഒരു വലിയ തേനീച്ചക്കൂട് ഉണ്ടായിരുന്നു. കുറച്ച് കാലം മുമ്പ് ഇതേ സ്ഥലത്തുണ്ടായിരുന്ന ഭീമൻ തേനീച്ചക്കൂട് ആദിവാസി വിഭാഗക്കാരായ ആളുകളെ എത്തിച്ച് നീക്കം ചെയ്തിരുന്നു.
എന്നാൽ തേനീച്ചകൾ വീണ്ടും ഇവിടെ തന്നെ കൂടുണ്ടാക്കി. പിന്നീട് ഈ കൂട് വലുതായി വന്നെങ്കിലും പൊലീസുകാർ അതിനെ ഗൗരവത്തോടെ കണ്ടില്ല. ഇന്ന് വൈകിട്ട് കൂടിളകി വന്ന തേനീച്ചകൾ പൊലീസുകാരെയും ഓഫീസിന് മുന്നിലൂടെ പോയ സ്ത്രീ അടക്കമുള്ളവരെയും കുത്തുകയായിരുന്നു. ഏഴ് പേരെയാണ് ഇപ്പോൾ ആശുപത്രിയിലേക്ക് മാറ്റിയിരിക്കുന്നത്. കൂടുതൽ പേർക്ക് കുത്തേറ്റില്ലെന്നാണ് വിവരം. പരിക്കേറ്റവരുടെ ആരോഗ്യനില സംബന്ധിച്ചും വ്യക്തത വന്നിട്ടില്ല.