Kerala
കോട്ടയത്ത് ആറ് മുൻസിപ്പാലിറ്റികളും കൈപ്പിടിയിലൊതുക്കി യുഡിഎഫ്
കോട്ടയം: കോട്ടയത്തെ ആറ് മുന്സിപ്പാലിറ്റികളും കൈപ്പിടിയിലൊതുക്കി യുഡിഎഫ്. ആറിടങ്ങളിലും അധ്യക്ഷ സ്ഥാനം പങ്കുവെക്കാനും ടേമുകളാക്കി ഭരിക്കാനുമാണ് തീരുമാനം.
ചങ്ങനാശ്ശേരിയില് മൂന്ന് ടേം അധ്യക്ഷ സ്ഥാനമാണ് നിലവില് തീരുമാനമായിരിക്കുന്നത്. ആദ്യ ടേമില് കോണ്ഗ്രസിന്റെ ജോമി ജോസഫായിരിക്കും അധ്യക്ഷ സ്ഥാനത്തിരിക്കുക. വൈക്കം മുന്സിപ്പാലിറ്റിയിലും അധ്യക്ഷ സ്ഥാനം മൂന്ന് ടേം ആയിരിക്കും. ആദ്യത്തെ ടേമില് അബ്ദുല്സലാം റാവുത്തര് അധ്യക്ഷനാകും.
ഏറ്റുമാനൂരിലും മൂന്ന് ടേമായി തന്നെയാണ് അധ്യക്ഷ സ്ഥാനം പങ്കിടുക. ആദ്യ അവസരം കോണ്ഗ്രസിന്റെ ടോമി പുളിമാന്തുണ്ടത്തിനെന്നാണ് പുറത്തുവരുന്ന വിവരം. പാലാ മുന്സിപ്പാലിറ്റിയില് ദിയ പുളിക്കക്കണ്ടം രണ്ടുവര്ഷം ചെയര് പേഴ്സണാകും. 21കാരിയായ ദിയ ഇന്ത്യയിലെ ഏറ്റവും പ്രായം കുറഞ്ഞ മുന്സിപ്പല് ചെയര്പേഴ്സണാകും. കോണ്ഗ്രസിനും കേരള കോണ്ഗ്രസിനും വിമത സ്ഥാനാര്ത്ഥി മായയ്ക്കും ഓരോ വര്ഷം വീതം അവസരമുണ്ടാകും. കോട്ടയത്ത് കോണ്ഗ്രസിന്റെ സന്തോഷ് കുമാര് ആദ്യ ടേമിലെ അധ്യക്ഷനാകും. കോട്ടയത്ത് രണ്ട് ടേമാണ് ഇത്തവണ ഉണ്ടാവുക.
പാലാ നഗരസഭയുടെ ചരിത്രത്തില് ആദ്യമായി കേരള കോണ്ഗ്രസ് എം പ്രതിപക്ഷ സ്ഥാനത്തെത്തും. മായയുടെയും പുളിക്കക്കണ്ടം കുടുംബത്തിന്റെയും പിന്തുണ ലഭിച്ചതോടെ യുഡിഎഫിന് കേവലഭൂരിപക്ഷമായി. കേരളാ കോൺഗ്രസ് എമ്മിലെ പത്തംഗങ്ങളിൽ ആർക്കും പുളിക്കക്കണ്ടം സ്വതന്ത്രരുമായി ഭരണം പങ്കിടാൻ താൽപര്യമില്ലാത്തതും യു.ഡി.എഫിന് ഗുണകരമായി.