Kerala
കന്യാസ്ത്രീകൾ ഉൾപ്പെടെയുള്ള അർഹരായ സ്ത്രീകൾക്ക് സാമൂഹ്യ സുരക്ഷാ പദ്ധതി ആനുകൂല്യം, തടസങ്ങൾ നീക്കാൻ സർക്കാർ
തിരുവനന്തപുരം: കന്യാസ്ത്രീകള് ഉള്പ്പെടെയുള്ള സ്ത്രീകള്ക്ക് സര്ക്കാരിന്റെ സാമൂഹ്യ സുരക്ഷാ പദ്ധതിയുടെ ആനുകൂല്യങ്ങള് ലഭ്യമാക്കുന്നതിനുള്ള തടസങ്ങള് നീക്കാനുള്ള പ്രത്യേക പദ്ധതിക്ക് അംഗീകാരം നല്കി സംസ്ഥാന സര്ക്കാര്.
മത സ്ഥാപനങ്ങളുടെ നിയന്ത്രണത്തിലുള്ള മന്ദിരങ്ങള്, മഠങ്ങള്, കോണ്വെന്റുകള്, ആശ്രമങ്ങള്, മതവുമായി ബന്ധപ്പെട്ട സ്ഥാപനങ്ങള് എന്നിവിടങ്ങളില് താമസിക്കുന്നവര്ക്കാണ് ആനുകൂല്യം ലഭിക്കുക. ഇന്ന് ചേര്ന്ന മന്ത്രിസഭാ യോഗത്തിലാണ് സുപ്രധാന തീരുമാനം കൈകൊണ്ടത്.
അവിവാഹിതരായ 50 വയസില് കൂടുതല് ഉള്ള സ്ത്രീകളില് ശമ്പളം, പെന്ഷന്, സര്ക്കാരിന്റെ മറ്റാനുകൂല്യങ്ങള് എന്നിവ ലഭിക്കാത്ത സ്ത്രീകളെ പ്രത്യേക വിഭാഗമായി കണക്കാക്കും. നിലവില് പെന്ഷന് അനുവദിക്കുന്നതിന് ആവശ്യമായുള്ള വരുമാന സര്ട്ടിഫിക്കറ്റ്, അവിവാഹിത സര്ട്ടിഫിക്കറ്റ് എന്നിവ ഇവര്ക്ക് ഒഴിവാക്കി നല്കും. ഇതിന് പകരം പ്രത്യേക അപേക്ഷാ ഫോറം അംഗീകരിക്കാനാണ് മന്ത്രിസഭാ യോഗത്തിന്റെ തീരുമാനം.