മരിയസദനത്തിൽ സ്വാതന്ത്ര്യദിനവും മാതാവിന്റെ സ്വർഗ്ഗാരോപണ തിരുനാളും ആചരിച്ചു;ജോസ് കെ മാണി ദേശീയ പതാക ഉയർത്തി

മരിയസദനത്തിലെ അന്തേവാസികളോടൊപ്പം ഇന്ത്യയുടെ 80-ാം സ്വാതന്ത്ര്യദിനവും പരിശുദ്ധ കന്യകാമറിയത്തിന്റെ സ്വർഗ്ഗാരോപണ തിരുനാളും സംയുക്തമായി ആചരിച്ചു. മരിയസദനത്തിൽ സംഘടിപ്പിച്ച ചടങ്ങിൽ സ്വാതന്ത്ര്യത്തിന്റെ മഹത്വവും പരിശുദ്ധ മാതാവിന്റെ ജീവിതസന്ദേശവും അനുസ്മരിച്ചു.

ചടങ്ങിൽ ശ്രീ. ജോസ് കെ. മാണി എം.പി. ദേശീയപതാക ഉയർത്തുകയും പരിശുദ്ധ മാതാവിന് പുഷ്പാർച്ചന നടത്തുകയും ചെയ്തു. രാജ്യത്തിന്റെ സ്വാതന്ത്ര്യത്തിനായി ത്യാഗം ചെയ്ത ധീരദേശാഭിമാനികളെ നന്ദിയോടെ അനുസ്മരിക്കുകയും അവരുടെ ത്യാഗങ്ങളാണ് ഇന്ന് നാം അനുഭവിക്കുന്ന സ്വാതന്ത്ര്യത്തിന്റെ അടിത്തറയെന്നും ചടങ്ങിൽ ഓർമ്മിപ്പിച്ചു.

സ്വാതന്ത്ര്യം എന്നത് അടിമത്തത്തിൽ നിന്നുള്ള മോചനം മാത്രമല്ലെന്നും സ്നേഹത്തോടും സമത്വത്തോടും സഹോദര്യത്തോടും കൂടി ജീവിക്കാനുള്ള അവകാശവും ഉത്തരവാദിത്വവുമാണെന്നും ചടങ്ങിൽ ചൂണ്ടിക്കാട്ടി. അതോടൊപ്പം, പരിശുദ്ധ മാതാവിന്റെ സ്വർഗ്ഗാരോപണ തിരുനാൾ വിശ്വാസത്തിന്റെയും വിനയത്തിന്റെയും സമർപ്പണത്തിന്റെയും ജീവിതത്തിലേക്ക് നമ്മെ ക്ഷണിക്കുന്നതാണെന്നും അനുസ്മരിച്ചു.

ചടങ്ങിന്റെ ഭാഗമായി ശ്രീ. അന്തിനാട് ജോസിന്റെ ‘നൂറ്റിയൊന്ന് കുറുക്കൻ കഥകൾ’ എന്ന പുസ്തകത്തിന്റെയും മരിയസദനം ലൈബ്രേറിയൻ ശ്രീ. രാജു ജോസഫ് തന്റെ കൈപ്പടയിൽ തയ്യാറാക്കിയ ബൈബിളിന്റെയും പ്രകാശനം ശ്രീ. ജോസ് കെ. മാണി എം.പി. നിർവഹിച്ചു. തുടർന്ന് ഇരുവരെയും ചടങ്ങിൽ ആദരിച്ചു.

മരിയസദനം ഡയറക്ടർ ശ്രീ. സന്തോഷ് ജോസഫ്, വാർഡ് കൗൺസിലർ ശ്രീ. ജിജി ബൈജു കൊല്ലപ്പറമ്പിൽ, മുൻ വാർഡ് കൗൺസിലർ ശ്രീ. ബൈജു കൊല്ലപ്പറമ്പിൽ എന്നിവർ ചടങ്ങിൽ പങ്കെടുത്തു.

മരിയസദനത്തിലെ അന്തേവാസികൾക്കൊപ്പം സംഘടിപ്പിച്ച ചടങ്ങ് സ്നേഹത്തിന്റെയും സഹോദര്യത്തിന്റെയും ഐക്യത്തിന്റെയും സന്ദേശം പകർന്നുനൽകി. രാജ്യത്തിന്റെ നന്മയ്ക്കും സമൂഹത്തിലെ സമാധാനത്തിനും ഐക്യത്തിനും വേണ്ടി ഒരുമിച്ച് പ്രവർത്തിക്കണമെന്നും പരിശുദ്ധ മാതാവിന്റെ മാധ്യസ്ഥ്യം തേടി രാജ്യത്തെയും കുടുംബങ്ങളെയും സ്ഥാപനങ്ങളെയും ദൈവത്തിന്റെ കരങ്ങളിൽ സമർപ്പിക്കണമെന്നും ചടങ്ങിൽ ആഹ്വാനം ചെയ്തു.