പ്രണയവിവാഹം കുടുംബത്തിന് നാണക്കേടുണ്ടാക്കിയെന്ന് ആരോപിച്ച് ഇരുപത്തിനാലുകാരിയെ സ്വന്തം പിതാവ് ദാരുണമായി കൊലപ്പെടുത്തി

ആഗ്ര: പ്രണയവിവാഹം കുടുംബത്തിന് നാണക്കേടുണ്ടാക്കിയെന്ന് ആരോപിച്ച് ഇരുപത്തിനാലുകാരിയെ സ്വന്തം പിതാവ് ദാരുണമായി കൊലപ്പെടുത്തി. ഉത്തർപ്രദേശിലെ ആഗ്രയിലാണ് നാടിനെ നടുക്കിയ ദുരഭിമാനക്കൊല നടന്നത്. സംഭവത്തിൽ പിതാവ് വിമൽ ശർമ്മയെ പോലീസ് അറസ്റ്റ് ചെയ്തു. മകളെ ക്രൂരമായി മർദ്ദിച്ച ശേഷം ഷാൾ ഉപയോഗിച്ച് കഴുത്തുഞെരിച്ചാണ് ഇയാൾ കൊലപാതകം നടത്തിയത്.

​ഐടിബിപി  ഉദ്യോഗസ്ഥനായ അമിത് പച്ചൗരിയുമായി അങ്കിത നാല് വർഷത്തോളമായി പ്രണയത്തിലായിരുന്നു. എന്നാൽ കുടുംബത്തിന്റെ ശക്തമായ എതിർപ്പിനെത്തുടർന്ന് നാല് മാസം മുൻപ് ഇരുവരും കോടതി മുഖേന രജിസ്റ്റർ വിവാഹം കഴിക്കുകയായിരുന്നു. വിവാഹശേഷം ഭർത്താവ് ജോലിസ്ഥലത്തേക്ക് മടങ്ങിയതിനെ തുടർന്ന് അങ്കിത സ്വന്തം വീട്ടിൽ തന്നെയാണ് താമസിച്ചിരുന്നത്.

​എന്നാൽ ഈ വിവാഹത്തെച്ചൊല്ലി വീട്ടിൽ നിരന്തരം തർക്കങ്ങൾ നിലനിന്നിരുന്നു. തിങ്കളാഴ്ച പുലർച്ചെയുണ്ടായ കടുത്ത വഴക്കിനൊടുവിലാണ് പിതാവ് ദാരുണമായ ഈ കൃത്യം ചെയ്തത്. വീടിനുള്ളിൽ നിന്ന് ശക്തമായ നിലവിളിയും അലർച്ചയും കേട്ട് അയൽക്കാർ വിവരമറിയിച്ചതിനെ തുടർന്ന് പോലീസെത്തി വാതിൽ തകർത്ത് അകത്തുകടക്കുകയായിരുന്നു. പോലീസെത്തുമ്പോൾ കൊല്ലപ്പെട്ട മകളുടെ മൃതദേഹത്തിന് സമീപം തന്നെയുണ്ടായിരുന്ന പിതാവിനെ ഉടൻ തന്നെ കസ്റ്റഡിയിലെടുത്തു.

​വിവാഹബന്ധത്തിൽ നിന്ന് പിന്മാറാൻ പലതവണ ആവശ്യപ്പെട്ടിട്ടും മകൾ തയ്യാറാകാത്തതിനാലാണ് കൊലപാതകം നടത്തിയതെന്ന് പ്രതി പോലീസിന് മൊഴി നൽകിയിട്ടുണ്ട്. സംഭവത്തിൽ ഭാരതീയ ന്യായ സംഹിത (BNS) പ്രകാരം കേസെടുത്ത് പോലീസ് കൂടുതൽ അന്വേഷണം നടത്തിവരികയാണ്. ഒരു ജീവിതവും പ്രണയവും സ്വന്തം വീടിന്റെ നാലുചുവരുകൾക്കുള്ളിൽ ദാരുണമായി ഒടുങ്ങിയതിന്റെ ഞെട്ടലിലാണ് പ്രദേശം.