ചെന്നൈ: ഉത്സവ സീസൺ പരിഗണിച്ച് ചെന്നൈ എഗ്മോർ റെയിൽവേ സ്റ്റേഷനും തിരുനെൽവേലിക്കും ഇടയിൽ പ്രത്യേക വന്ദേ ഭാരത് സർവീസ് നടത്തും. ചെന്നൈ മലയാളികൾ ഉൾപ്പെടെയുള്ളവർക്ക് പുതിയ സർവീസുകൾ നേട്ടമാകും. ദക്ഷിണ റെയിൽവേ (എസ്ആർ) സോണാണ് ട്രെയിൻ പരിപാലിക്കുന്നതും പ്രവർത്തിപ്പിക്കുന്നതും.
എട്ട് കോച്ചുകളുള്ള വന്ദേ ഭാരത് ട്രെയിനുകളാണ് അനുവദിച്ചിരിക്കുന്നത്. ചെന്നൈ എഗ്‌മോറിൽ നിന്ന് തിരുനെൽവേലിയിലേക്കുള സർവീസ് നവംബർ 16, 23, 30 തീയതികളിലും ഡിസംബർ മാസത്തിൽ 7, 14, 21, 28 ദിവസങ്ങളിലായിരിക്കും സർവീസ്. എഗ്‌മോറിൽ നിന്ന് രാവിലെ ആറുമണിക്ക് പുറപ്പെടുന്ന ട്രെയിൻ ഉച്ചയ്ക്ക് 2.15ന് തിരുനെൽവേലിയിലെത്തും.
തിരുനെൽവേലിയിൽ നിന്ന് ചെന്നൈ എഗ്‌മോറിലേക്കുള്ള ട്രെയിൻ ഉച്ചയ്ക്ക് ശേഷം മൂന്ന് മണിക്ക് സർവീസ് ആരംഭിച്ച് 11.15ന് ചെന്നൈ എഗ്മോറിലെത്തും. ചെന്നൈ എഗ്മോർ – തിരുനെൽവേലി വന്ദേ ഭാരത് സ്‌പെഷൽ വിവിധ സ്റ്റേഷനുകളിൽ നിർത്തും. ആറ് സ്റ്റേഷനുകളിലാകും സ്റ്റോപ്പ് ഉണ്ടായിരിക്കുക. താംബരം, വില്ലുപുരം ജംഗ്ഷൻ, തിരുച്ചിറപ്പാലി, ഡിണ്ടിഗൽ ജംഗ്ഷൻ, മധുര ജംഗ്ഷൻ, വിരുദുനഗർ ജംഗ്ഷൻ റെയിൽവേ സ്റ്റേഷനുകൾ ഇവയാണ്.
ദീപാവലി പ്രമാണിച്ച് ദക്ഷിണ റെയിൽവേ ചെന്നൈ എഗ്‌മോറിനും തൂത്തുക്കുടിക്കുമിടയിൽ പ്രത്യേക ട്രെയിനുകൾ സർവീസ് നടത്തിയിരുന്നു. സെന്റ് തോമസ് മൗണ്ട് സ്റ്റേഷനിലെ ഗർഡറുകളുടെ ജോലികൾ നടക്കുന്നതിനാൽ ചെന്നൈ എഗ്മോർ റെയിൽവേ സ്റ്റേഷനിൽ നിന്നുള്ള മൂന്ന് എക്സ്പ്രസ് ട്രെയിനുകൾ വ്യാഴം, വെള്ളി ദിവസങ്ങളിൽ താംബരത്ത് നിന്ന് പുറപ്പെടും. ചെന്നൈ എഗ്മോർ മന്നാർഗുഡി എക്സ്പ്രസ്, ചെന്നൈ എഗ്മോർ മംഗളൂരു സെൻട്രൽ എക്സ്പ്രസ്, ചെന്നൈ എഗ്മോർ ട്രിച്ചി റോക്ക്‌ഫോർട്ട് എക്സ്പ്രസ് എന്നിവയെല്ലാം താംബരത്തുനിന്ന് പുറപ്പെടും. ട്രെയിൻ നമ്പർ 22153, ചെന്നൈ എഗ്മോർ സേലം സൂപ്പർഫാസ്റ്റ് എക്സ്പ്രസ് വഴിതിരിച്ചുവിടുകയും താംബരത്ത് നിർത്തില്ല.
