ചെന്നൈ :ജല്ലിക്കട്ടിന് മുന്നോടിയായി നടക്കുന്ന പരിശീലനത്തിനിടെ കാളകള്‍ വിരണ്ടോടി 50 ഓളം പേര്‍ക്ക് പരിക്ക്. ജല്ലിക്കട്ടിന് മുന്നോടിയായി കാളകളെ മെരുക്കാന്‍ നടത്തുന്ന തിരുവിഴക്കിടെയാണ് അപകടം ഉണ്ടായത്. മാര്‍കഴി മാസത്തിലെ അമാവാസിയുമായി ബന്ധപ്പെട്ടാണ് ഊര് തിരുവിഴ നടക്കുന്നത്. ജല്ലിക്കട്ടിന് മുന്നോടിയായി കാളകളെ പരിശീലിപ്പിക്കാന്‍ ആചാരപരമായി നടക്കുന്ന ചടങ്ങാണിത്.
തിരുവണ്ണാമലൈ, ആറണി, കണ്ടമംഗലത്താണ് ചടങ്ങ് നടന്നത്. തിരുവണ്ണാമലൈ, കാഞ്ചീപുരം, റാണിപേ‍ട്ട്, കൃഷ്ണഗിരി ജില്ലകളില്‍ നിന്നായി അഞ്ഞൂറിലേറെ കാളകളും ആയിരത്തിലേറെ ആളുകളും ചടങ്ങില്‍ പങ്കെടുത്തിരുന്നു. ചടങ്ങ് നടത്താന്‍ സംഘാടകര്‍ പോലീസ് അനുമതി തേടിയിരുന്നെങ്കിലും കൊവിഡ് വ്യാപിക്കുന്ന പശ്ചാത്തലത്തില്‍ അനുമതി നിഷേധിച്ചിരുന്നു.
ചടങ്ങില്‍ വേണ്ടത്ര സുരക്ഷാ തയ്യാറെടുപ്പുകളും നടത്തിയിരുന്നില്ല. ഇതിന് ഇടയിലാണ് കാളകള്‍ വിരണ്ടോടി അപകടം ഉണ്ടായത്. അനുമതിയില്ലാതെ ചടങ്ങ് സംഘടിപ്പിച്ചതിന് സംഘാടകര്‍ക്കെതിരെ തിരുവണ്ണാമലൈ പോലീസ് കേസെടുത്തു. ഈ മാസം 15നാണ് തമിഴ്നാട്ടില്‍ മാട്ടുപൊങ്കല്‍. ഇതുമായി ബന്ധപ്പെട്ട് നിരവധി ചെറുതും വലുതുമായ ജല്ലിക്കട്ടുകള്‍ നടക്കും. എന്നാല്‍ ജല്ലിക്കട്ടിന് സര്‍ക്കാര്‍ ഇതുവരെ അനുമതി നല്‍കിയിട്ടില്ല.
