തിരുവനന്തപുരം : കേരളത്തില്‍ കോഴി മുട്ട വില കുതിക്കുന്നു. തിരുവനന്തപുരത്ത് മുട്ടയുടെ വില 6.55. കൊച്ചിയില്‍ ഒരു മുട്ടയുടെ റീട്ടെയില്‍ വില ഏഴുരൂപ കടന്നു. മൊത്തവില 5.70 രൂപയാണ്. 100 രൂപക്ക് 30 മുട്ട കിട്ടിയിരുന്ന സ്ഥാനത്ത് 15 എണ്ണം പോലും കിട്ടാത്ത സാഹചര്യമാണ്. മേയില്‍ മൊത്തവില മുട്ട ഒന്നിന് 3.60 രൂപവരെ എത്തിയിരുന്നു. ഒരു മാസം പിന്നിടുമ്പോള്‍ വില കുത്തനെ ഉയര്‍ന്ന് 6.15 രൂപയില്‍ എത്തിയിരിക്കുകയാണ്.
ഉല്‍പാദനം കുറഞ്ഞതിനൊപ്പം ഉപഭോഗം കൂടിയതാണ് കാരണമെന്നാണ് മുട്ട വിതരണ മേഖലയിലുള്ളവര്‍ പറയുന്നത്. കോവിഡിനെ തുടര്‍ന്ന് രണ്ടു വര്‍ഷത്തിനുശേഷം സ്കൂള്‍ തുറന്നതോടെ മുട്ടക്ക് ഡിമാന്‍ഡ് വര്‍ധിച്ചു. സ്കൂളുകളിലെ ഭക്ഷണത്തില്‍ മുട്ട നിര്‍ബന്ധമാക്കിയത് മറ്റൊരു കാരണമായി. സംസ്ഥാനത്ത് ട്രോളിങ് നിരോധനം നിലവില്‍വന്നതോടെ മല്‍സ്യത്തിന്റെ ലഭ്യത കുറഞ്ഞതോടെ വീടുകളിലും മുട്ട ഉപയോഗം കൂടി. കേരളത്തിലേക്ക് മുട്ട പ്രധാനമായും എത്തുന്ന തമിഴ്നാട് നാമക്കലില്‍നിന്നാണ്. അവിടെ എത്തുന്ന മുട്ടയുടെ എണ്ണത്തിലും വന്‍ കുറവുണ്ടായിട്ടുണ്ട്. ഉത്തരേന്ത്യന്‍ സംസ്ഥാനങ്ങളിലേക്ക് വ്യാപകമായി കയറ്റി അയക്കുന്നതാണ് ദൗര്‍ലഭ്യത്തിന് ഒരു കാരണം.
ജൂണ്‍ ഒന്നിന് 4.80 രൂപയുണ്ടായിരുന്ന മുട്ടവില പത്താം തീയതി ആയപ്പോള്‍ 5.10 ആയി ഉയര്‍ന്നു. 24ന് 5.20ലേക്ക് ഉയര്‍ന്നു. ഓരോ ദിവസം പിന്നിടുമ്പോഴും വില വര്‍ധിക്കുകയാണ്. കോവിഡ് വ്യാപന പശ്ചാത്തലത്തില്‍ വന്‍നഷ്ടം നേരിട്ടതോടെ കര്‍ഷകര്‍ മുട്ട ഉല്‍പാദനം നിയന്ത്രിച്ചിരുന്നു.
