കൊച്ചി :കൊവിഡ് വാക്സിന് സര്ട്ടിഫിക്കറ്റില് പ്രധാനമന്ത്രി നരേന്ദ്രമോദിയുടെ ചിത്രം പതിക്കുന്നത് ചോദ്യം ചെയ്തുള്ള അപ്പീല് ഹൈക്കോടതി ഡിവിഷന് ബെഞ്ച് തള്ളി.കടുത്തുരുത്തി സ്വദേശി പീറ്റര് മ്യാലിപ്പറമ്പില് ആണ് ഹര്ജിക്കാരന്. 1 ലക്ഷം രൂപ പിഴ ചുമത്തി സിംഗിള് ബഞ്ച് നേരത്തെ ഹര്ജി തള്ളിയിരുന്നു. സര്ട്ടിഫിക്കറ്റില് പ്രധാനമന്ത്രിയുടെ ചിത്രം ഉള്പ്പെടുത്തുന്നത് ശരിവെച്ച സിംഗിള് ബെഞ്ച് ഉത്തരവിനെതിരെ ആയിരുന്നു അപ്പീല്. പണം കൊടുത്ത് സ്വകാര്യ ആശുപത്രിയില് വാക്സിന് എടുക്കുമ്പോള് മോദിയുടെ ചിത്രം പതിക്കുന്നത് മൌലികവകാശ ലംഘനം എന്നായിരുന്നു ഹര്ജിക്കാരന് വാദിച്ചത്.
ഫോട്ടോ പതിക്കുന്നത് പരസ്യമായി കണക്കാക്കാന് കഴിയില്ലെന്ന് ഹൈക്കോടതി പറഞ്ഞു. വാക്സിനേഷനുമായി ബന്ധപ്പെട്ട് സന്ദേശം നല്കാന് പ്രധാനമന്ത്രിക്ക് അവകാശമുണ്ടെന്നും ഹൈക്കോടതി ഡിവിഷന് ബെഞ്ച് നിരീക്ഷിച്ചു. യോഗ്യതയുള്ള വ്യക്തിയെയാണ് ജനം തെരഞ്ഞെടുപ്പിലൂടെ പാര്ലമെന്റില് എത്തിക്കുന്നത്. അടുത്ത തെരഞ്ഞെടുപ്പ് നടക്കുന്നത് വരെ അദ്ദേഹം രാജ്യത്തിന്റെ പ്രധാനമന്ത്രിയാണ്. പ്രധാനമന്ത്രിയെ ബഹുമാനിക്കേണ്ട ഉത്തരവാദിത്തം പൗരന്മാര്ക്കുണ്ടെന്നും ജസ്റ്റിസ് പി വി കുഞ്ഞികൃഷ്ണന് പറഞ്ഞിരുന്നു.
വാക്സിന് സര്ട്ടിഫിക്കറ്റിലെ പ്രധാനമന്ത്രിയുടെ ചിത്രം സ്വകാര്യതയിലേക്കുള്ള കടന്നുകയറ്റമാണെന്ന വാദത്തിനും ശക്തമായാണ് കോടതി മറുപടി നല്കി. പാര്ലമെന്റ് മന്ദിരത്തിലേക്ക് മേല്ക്കൂര പൊളിച്ച് എത്തിയ വ്യക്തിയല്ല ഇന്ത്യയുടെ പ്രധാനമന്ത്രി. ജനങ്ങളുടെ തീരുമാനമാണ് പ്രധാനമന്ത്രിയെ തെരഞ്ഞെടുത്തതെന്നും കോടതി വിശദമാക്കി. തീര്ത്തും ബാലിശമായ ഹര്ജിയാണ്. പൊതുതാല്പര്യമല്ല, പ്രശസ്തി താല്പര്യമാണ് ഹര്ജിയ്ക്ക് പിന്നിലെന്നും ജസ്റ്റിസ് പി.വി.കുഞ്ഞികൃഷ്ണന് അഭിപ്രായപ്പെട്ടത്.