മാനന്തവാടി: എക്സൈസ് സര്‍ക്കിള്‍ ഇന്‍സ്പെക്ടര്‍ അടക്കം ഉള്ള ഉദ്യോഗസ്ഥര്‍ സഞ്ചരിച്ച വാഹനം കാട്ടാന ആക്രമിച്ചു. മാനന്തവാടി എക്സൈസ് സര്‍ക്കിള്‍ ഇന്‍സ്പെക്ടര്‍ സജിത്ത് ചന്ദ്രനും സംഘവും സഞ്ചരിച്ച വാഹനമാണ് കാട്ടാന നശിപ്പിച്ചത്. ഇന്നലെ രാത്രി എട്ടുമണിയോടെ കാട്ടിക്കുളം – ബാവലി റോഡിലെ രണ്ടാം ഗേറ്റിന് സമീപത്തായിരുന്നു സംഭവം.
ബാവലി എക്സൈസ് ഉദ്യോഗസ്ഥര്‍ ജോലി കഴിഞ്ഞ് മാനന്തവാടിയിലേക്ക് തിരികെ വരുമ്പോൾ വഴിയരികില്‍ നിന്ന് ഓടിയെത്തിയ ആന ആക്രമിക്കുകയായിരുന്നു. വാഹനത്തിന്റെ മുന്‍ഭാഗം കുത്തിപ്പൊളിച്ച ആന യാത്രക്കാരില്‍ ആരെയും ആക്രമിച്ചില്ല. വാഹനത്തിലുണ്ടായിരുന്നവര്‍ ഒച്ച വെച്ചതിനെ തുടര്‍ന്നാണ് ആന ആക്രമിക്കാതെ പിന്‍വാങ്ങിയത്.
